Ainda cunukeronan ta skeptico cu firma di MoU pa abastece nan cu awa

Ayera den cuadro di Dia Internacional di Awa, a wordo firma un acuerdo di entendimento (MoU) entre minister di sector primario, Chris Romero (MEP), director di WEB Aruba NV, Luis Oduber y directora di Santa Rosa, Natalie Maduro. E proposito tras di e MoU ta di bin cu un plan sostenibel y duradero pa suministra awa na nos cunukeronan.

Firma MoU
Pero e cunukeronan presente tabata mas skeptico cu alegria cu e acto di firmamento di e MoU cu a tuma luga meymey den un ambiente di naturalesa na Santa Rosa mes. Sinembargo e importancia di e documento aki ta esun cu a crea e base di un compromiso, y nan ta mara na cierto polisa na largo plaso.

E mandatario Romero a admiti cu berdaderamente ta existi pa añanan largo un problema grandi mundialmente di awa, y no na Aruba so, riba parti di agricultura y esaki ta crea un reto grandi. Specialmente cerca WEB NV cu ta nos planta di produccion y suministro di awa. Produccion di awa na Aruba ta caro y esaki tin di haber cu e calidad, segun e mandatario.

Te ainda nan no a presenta nada concreto, pero nan ta spera cu den transcurso di tres luna nan lo por presenta algo. Nan lo cuminsa traha un plan cu ta envolvi diferente partner entre nan e cunukeronan . E plan aki di suministro di awa mester ta concreto y sostenibel pa e agricultornan no confronta mas problema cu awa pa un tempo largo.

E mandatario a trece e cifra cu mundialmente un 60% di nos naturalesa ta wordo uza pa produccion di alimento. Pa 2030 ta wordo pronostica cu esaki mester yega un 100%. E ta haya cu Aruba por ta auto sostenibel un dia, pero e proceso ta hopi largo ainda. E prome fase lo ta reenforsa e produccion di fruta y berdura pa no sigui depende di otro pais, manera e crisis actual cu Venezuela ta un ehempel tangible di dje.

Alternativanan di pasado
Pero con a para cu e otro alternativa cu a wordo formula den pasado pa suministra awa pa nos cunukeronan? Santa Rosa ta spera cu nan por sigui haya awa for di e plata di purificacion pa medio di sistema di UV. Esaki den caso di emergencia, pero tin cierto sistema interno cu no tin di haber cu Santa Rosa mes.

Mientras cu sr. Oduber a splica cu for di 2012, WEB a cambia su proceso di produci awa completamente. E awa pa spula cu nan tabata uza antes pa nan planta bieu ta cos di pasado, y no ta existi mas. Locual si nan ta spula ta nan sistema di tuberia rond di Aruba, y e awa aki lo por wordo uza pa agricultura.

Nan ta buscando e forma logistico pa distribui e awa aki pa e cunukeronan. Ya cu tin biaha ora cu nan ta bay spula e tubonan den oranan di atardi, no tin trucknan disponibel of transporte suficiente pa por hiba e awa ey. Santa Rosa mes tabatin problema cu varios truck daña. Pero sr. Oduber no ta descarta e posibilidad di bin cu un acuerdo pa asina saca probecho efectivo pa e awa di spula tubo no bay perdi.

Santa Rosa
Despues di scucha e declaracion di minister di sector primario y tambe di director di WEB, directora di Santa Rosa a haya cu e MoU firma ta un paso hopi importante. Santa Rosa tin hopi aña buscando alternativa pa yuda e agricultornan y esaki sigur ta otro paso pa yuda nan na largo plaso. Nan vision ta cu e actividad di agricultura no ta uno solamente recreacional pa planta pa famia mes. Sino cu e por bira un oportunidad pa haci negoshi. Te hasta e por bira otro sector economico nobo.

Den cuadro di Dia Mundial di Awa, sra. Maduro a probecha e oportunidad aki pa manda un mensahe di conscientisacion pa nos cunukeronan pa nan purba di uza awa mas consciente. Tin sistema manera hidro-ponico y aqua-ponico cu ta yuda spaar awa y nan ta rekeri un calidad di awa mas halto.

Tambe el a sugeri pa nos agricultor probecha ora cu awa ta yobe pa colecta nan. Segun nan calculo, considerando e cantidad di alrededor di 400 cunukero registra di cual no mas cu 20 di nan tin plantacion grandi, nan ta demanda 12 mil meter cubico pa luna di awa. Mientras cu pa aña pasa Santa Rosa a distribui solamente 20 mil meter cubico.

 

 

You May Also Like

Minister: Cambio di ley pa duna polis mas poder

Minister di Husticia Arthur Dowers a propone pa bin cu e ley di combati ...

image.jpeg

Bastante persona ilegal deteni den Silla Bar Restaurant den Hendrikstraat Trash

Diasabra marduga polisnan a drenta Hendrikstraak y na final di e caya a cuminsa ...

DIP: ‘No a pasa ningun akte pa tereno na Malmok’

E tema di parcelanan di saliña na Malmok pa wordo otorga ta bolbe bin ...

‘Por pasa busca vacuna contra Gele Koorts na DBZ’

Ayera mainta a tuma luga e conferencia di prensa di Directie Volksgezondheid (DVG), unda ...

Mas hende ta exclui for di nos comunidad

Den e presentacion recientemente na Universidad di Aruba riba ‘accesibilidad den un Aruba envelhecendo’ ...