Ainda falta 20 mil florin pa Shady busca su salud na Hulanda

Sra. Yudina Romero kende ta mama di Shadienskah Janzen cariñosamente conoci como ‘Shady” a pidi e solidaridad di henter comunidad pa recauda e fondo cu ainda nan tin mester pa compaña su yiu di apenas 9 aña bay Hulanda pa haya tratamento medico.

E ta sufriendo pa dos aña di cierto complicacion di salud cu no por diagnostica precies kico ta e problema di auto immun cu e tin, y cada bes su situacion ta birando mas complica. E deseo di nan famia ta pa Shady por tin un bida normal bek.

Nan a yega di organisa algun actividad caba y danki na e bon curason di nos hendenan, nan a logra colecta alrededor di 30 mil florin, pero te ainda ta falta un montante di 20 mil florin cu ta e suma cu nan mester como garantia di AZV pa asina nan por biaha cu Shady pa Hulanda.

Sra. Romero a splica cu na comienso nan mester yega na 20 mil florin. Pero a resulta cu e suma aki no ta florin sino Euro, despues di un combersacion cu nan a sostene cu AZV. Ta asina cu nan ta spera un suma total di 50 mil florin. “Mientras cu nos no tin esey, nos no por sinta cu nan bek,” el a declara.

Nan deseo ta pa Shady por bay Hulanda pa busca su salud prome cu fin di aña. Esey ta e suma cu nan mester como un garantia cu nan por paga nan propio gastonan pa compaña Shady na Hulanda, ya cu e no por bay su so. Tin cambio cu a bin cu e pandemia, caminda AZV no ta cubri acompañante mas.

Nan no a subi caya mas pa colecta fondo, pero si nan ta bay tin un actividad chikito bek dia 29 di november y despues nan ta sigui cu otro actividad cu Youth Club di YMCA ta organisando dia 20 di december awor. Ta trata di un car rally bou e nomber Team Up4Shady Car Rally.

E ta cuminsa for di 10’or di mainta dilanti di Massive FM na San Nicolas y e lo finalisando pa 2’or di atardi na YMCA San Nicolas. E inscripcion ta 25 florin pa auto. Tur esunnan interesa por inscribi na YMCA Dakota of YMCA San Nicolas. Pero tambe via Facebook di YMCA Youth Club nan por haya un link pa haci e inscripcion online.

El a gradici e Youth Club di YMCA cu a acerca su famia pa uni forsa cu e actividad aki y asina yuda Shady yega e suma cu e mester pa busca su salud. Sra. Romero a haci un yamado na cada persona cu por yuda den e actividad aki cu ta uno agradabel y familiar. Pero teniendo cuenta semper cu e normanan di DVG pa evita e contagio di Covid. “Na mesun momento bo ta yudando Shady tambe yega mas cerca di su salud,” el a bisa.