Mester bin cambio den e sistema di cobra belasting, pasobra no solamente e cumplimento cu pago ta un problema, pero e sistema di Aruba ta crea impresion di mas entrada cu realmente tin. Asina ex Minister di Finanzas Angel Bermudez a bisa Bon Dia Aruba.

Como tal, e ta apoya e cambionan proponi den e landspakket (y tambe e consehonan di reforma di Raad van Advies) pa loke ta e sistema di belasting. E Organo di Reforma y Desaroyo COHO tin riba su bista fiho y no ta cuestion cu Hulandesnan ta duro, pero nan ta firme si riba e intencion. Pasobra hecho ta cu pa hopi tempo caba, mester a trece cambionan den diferente area, for di finanzas, belasting te enseñansa.

E aspecto di finanzas y belasting ta di special interes. Pa Bermudez kende a experiencia e crecemento explosivo di debe di Aruba ta kere cu e ora a yega pa reforma.

El a splica cu un di e motibonan cu Gabinete Mike Eman II a resisti e introduccion di e Algemene Bestedingbelasting, e ABB, tabata e miedo pa e ‘backlash’ politico, pasobra e cifra di un ABB, cu en realidad ta inclui tur otro belasting, ta zona halto. Pero kizas mas importante, cu e sistema con tabata maneha belasting, no tabata adecuado y no tabata duna un bon bista riba e entradanan di pais Aruba.

“SIAD no tabata draai bon. No tabata genera bastante entrada. Gobierno por fia y ta gasta segun entrada den bo presupuesto. Pero si bo servicio di belasting, bo ‘cash cow’ no ta genera suficiente ‘cashflow’, Gobierno ta fia. Pasobra kier realisa locual a planifica. Esey a pasa,” Bermudez a splica. “P’esey mi enfoke tabata pa drecha SIAD.”

Bermudez ta contento cu e trabou di e Director cu el a nombra, esta Luenne Pieters y e inversion den automatisacion, pa hisa e cumplimento. Pero, Bermudez ta reconoce cu e pasonan aki no tabata suficiente, pasobra no a hisa e cumplimento. Consecuentemente Gobierno tabata gasta placa cu no tabatin. Of mester fia. Y ta eynan a cos a bay robes.”

Cumplimento

Te ainda, locual SIAD ta saca afo pa cobra, “tin mucho aire aden y tin hende cu conscientemente no ta cumpli cu nan impuesto,” Angel Bemudez a splica. “Nan no ta yena nan formulario, no ta paga. Esey ta locual ta considera ‘belastingontduiking.’”

Pero, ora cu Gobierno ta bisa cu tin 2 biyon di belasting riba caya, e suma aki ta consisti di tanto e ‘aire’ como e ‘ontduiking.’

E problema di e ‘aire’ ta bon conoci pa hopi cu tin companianan. Bermudez mes ta experienci’e. “Mi tabatin algun companianan ta maneha, cu mi a stop desde 2010. Na Aruba, mi tin algun NV, di cual dos, nunca tabatin actividad, nunca. Pero mi ta haya tur luna e cobranza pa loonbelasting, AOV, AZV, BAZV. Mi sa cu e companianan aki no debe nada pasobra no tabatin actividad.” Mester para e cobranza automatico aki ( cu ta sosode pa medio di e sistema automatico di SIAD) pasobra ta infla e cantidad di placa cu supuestamente mester cobra sin cu e ta e realidad. “Y ami so tabatin tres compania asina ey.” E ironia ta cu e mesun ex Minister di Finanzas di Aruba, un fiscalista su mes, mester a busca servicio di coleganan na Aruba, pa regla e asunto p’e, pasobra e no por a bolbe Aruba durante e periodo cu Aruba tabata den Code Oranje. Riba dje, cada biaha e suma di debe ficticio aki ta keda subi pasobra ta haya boet riba boet.

Gasto publico basa riba entrada ficticio

“Mester stop esaki, pasobra ta trata di cobranza di sumanan ficticio. Mester entrega obhecion (bezwaar) contra e aanslag, pero e suma ta keda den e bukinan. Administrativamente SIAD mester ‘ruim op,’” e ex Minister a bisa. E ta nifica un atencion riba e sistema automatico di cobranza. Y ta hopi hende tin problema asina, Bermudez a sigui bisa. Si e individuo of doño di compania no controla bon, e debe di ‘aire’ por crece si, y hinca e compania of individuo den problema a lo largo. “Tur esakinan ta contribui cu hendenan no ta gusta SIAD y ta stroba e cumplimento di pago manera mester ta. A pesar di hopi adelanto, SIAD no ta traha cu cifranan real, di momento.”

Los di e iritacion personal, e implicacion pa Pais Aruba ta mucho mas grandi. Pasobra ta duna e impresion comosifuera e entrada di Gobierno ta mas cu e ta en realidad. Pa e politico cu mester dicidi riba e fondonan, e ta mas facil pa bay presta “pasobra toch tin e placa riba caya,” cu haci e esfuerso pa cobra of drecha e sistema. “E placa ey lo no drenta, pasobra e ta aire. Esey a pasa cu Gobierno Mike Eman II. A wak cu tin dos biyon riba caya y no a enfoca riba con ta cobra e suma, pero a dicidi pa fia, pasobra nan tabata bou impresion cu e placa lo drenta caha di Gobierno un dia toch. Na 2018 y 2019, ora cu SIAD tabata draai hopi miho, danki na e trabou di Luenne Pieters y su team, Gobierno actual a cobra hopi mas cu locual ami como Minister a cobra den tur e añanan. Pero nan a gast’e tambe.”

Balor di cuentanan anual

E sistema anticua aki tambe a pone cu no ta manda cuentanan anual di Gobierno pa Parlamento. For di 2016 tin e cuentanan anual wanta, pasobra eynan ta pone luz riba un situacion cu no ta cana bon. P’esey Caft ta pidi pa saca e cuentanan anual, pasobra e ora ta bira cla cuanto placa a gasta di berdad y cuanto e entrada tabata.” Segun Bermudez, e cuentanan anual lo mustra cu e cobramento di belasting a aumenta drasticamente den e ultimo añanan. “Mare ami tabatin e entradanan cu e Gobierno aki tabatin prome cu Covid. Ta p’esey nan por a proyecta un surplus chikito, ademas cu a hisa e BBO y a bin cu e cobranza nobo di BAVP.” Es mas, Gobierno por a cobra miho pasobra a scoge pa mas belasting indirecto, cu ta mas facil pa cobra cu e belasting directo, cu ta e inkomsten, loon y winstbelasting.

Sosten pa SIAD

Angel Bermudez ta di opinion cu pa drecha e cobramento y servicio di SIAD, e departamento mester haya sosten pa mas capacidad. Por ehempel, e ta convenci cu motibo pakico awor aki tin un proyecto pa paga menos riba ganashi ta sinta riba e hecho cu nunca a soluciona e debenan bieu, “Tin bezwaar riba si nan ta corecto of no. Pues awor a bisa cu pa paga, ta haya descuento. Tin hende ta bay paga pa caba cu e asunto, pero en realidad e no ta bon. Elimina tur e ‘idioterianan chikito’ cu ta e zegelbelasting y otronan cu ta mas trabou cu ganashi y concentra riba cobra e belasting indirecto. Esun cu ta gasta mas ta bay paga mas. Awor aki hopi hende ta den un bol di hilo cu no por sali afo, y awor no por sali afo pasobra no tin e capacidad bastante pa sali afo.

Comunica e balor di e cambionan

Ta p’esey e conseho pa ultimo temponan tabata pa Gobierno bay mas den e esfera di belasting indirecto pasobra esey ta logra cobra mesora, y ta mas simpel. “Mi ta contento cu ta bay haci e cambio ey na Aruba.”

Bermudez ta adverti si cu e cambionan lo por ta pisa, aunke cu nan lo no ta malo pa ningun hende. E ta bay mishi sector publico y sector priva igual, pero pa e traha pa bon, mester crea plataforma pa sostene e cambionan aki manera COHO ta propone. “Mester comunica, integra, informa e sectornan den proceso di cambio, pasobra di otro forma e no ta traha. E belasting ta un bon ehempel con importante e ta pa comunica pa crea synergia. Si comunidad no compronde y despues carg’e, e ta bira un ehercicio teoretico. Comunidad mester compronde e cambio pa nan carg’e,” ta e conseho di Angel Bermudez.

 

LEAVE A REPLY

Please enter your comment!
Please enter your name here