parke marino

Vice presidente y secretario di Aruba Marine Park, sr. Castro Perez a declara na Bon Dia Aruba cu e fundacion aki ta activo keto bay. Actualmente un di nan tarea grandi ta e conscientisacion pa cu e problematica di e especie invasivo di Lionfish.

Encuanto e area cu lo kier a reserva como parke marino na Aruba, el a bisa cu cos ta cu nos no tin un ley cu lo por uza pa reserva cierto area. “Tanten cu e ley pa cu un parke marino no ta wordo pasa den comun acuerdo den conseho di minister, y despues pa Parlamento, nos ta keda cu e mesun cuestion cu e parke marino no tin autoridad”, segun sr. Perez.

Inicialmente esaki tabata intencion ora cu e fundacion aki a wordo lanta. Ainda ta den man di gobierno pa bin cu cambio den e ley cu ta regarda e parti marino pa destina un area pa proteccion di nos bida marino tanto fauna como flora.
Sr. Perez a indica cu ta gobierno esun cu mester tuma un decision final di bay di acuerdo pa e pasonan positivo pa nan por sigui traha riba e parti di conservacion marino.

Cambio di ley
Igualmente el a bisa cu dependiendo di tur e usuarionan cu ta haci uzo di lama, fundacion Aruba Marine Park lo por yega na fondo pa por maneha y haci proyecto.
“Mientras tanto cu nos no tin nada di esey, nos ta keda cu e handicap cu nos ta conta solamente ariba e conscientisacion di e gruponan y organisacion cu lo por yuda nos”, el a declara.
Conscientisacion
A pesar cu e cambio di ley no a tuma luga sr. Perez a indica cu e fundacion aki ta sigui cu e tarea di conscientisacion pa “no keda man crusa”.

E ta haya cu un di e manera pa haya hopi atencion ta organisando un torneo nacional, ya cu cada bes cu nan ta organisa e tipo di actividad aki, ta wordo contribui hunto cu e sambuyado y e piscado di Lionfish pa controla e poblacion di e pisca aki di nos especie marino tipico. Pero tambe loke nan ta haciendo durante aña, y por ta no ta ricibi tanto publicidad, ta e lecturanan cu nan ta duna na scol. Tambe den hopi ocasion nan ta asisti e studiantenan cu ta trahando nan proyectonan tocante Lionfish of tambe di otro especie marino, y tambe cuido di e rifnan y coral.

 

LEAVE A REPLY

Please enter your comment!
Please enter your name here