Ainda no tin un bista cuanto solicitud a drenta den Comision di Retiro

Comision di Retiro a cuminsa traha back conforme na criteria y reglanan laboral vigente cu tabata existi caba, asina minister di Labor, Glenbert Croes a declara na Bon Dia Aruba.

E mandatario mes no tabatin un bista exacto cuanto solicitud di retiro a drenta caba pa consecuencia di e coronavirus crisis. Sinembargo el a priminti cu via departamento di Labor (DAO) e informacion concreto aki por yega prensa. Pues cuanto solicitud di retiro tabata den tapara pa wordo atendi ora cu e mandatario a instrui DAO pa para tur e proceso di e Comision di Retiro.

E mandatario a bisa cu su decision tabata den interes di garantisa un proteccion di trabao pa impedi retiro di trahadonan. Esaki den bista cu gobierno ta dunando FASE y tambe nan a bin cu subsidio di salario pa preserva trabao. Ya cu ta gobierno ta esun cu ta pagando via e subsidio di salario pa e companianan paga nan trahadonan.

Tambe ta gobierno ta pagando FASE cu sacrificio di e trahadonan di sector publico, el a declara. Ademas di otro ayudo no solo economico sino alimenticio. P’esey ora cu gobierno a dicidi di bin cu un paro pa no retira trahado, ta pasobra nan ta yudando pa nan keda paga e trahado, segun e mandatario.

“Awendia tin hopi compania cu danki na yudansa di gobierno ta habri,” el a declara.

Despues di un caso den corte no faborabel pa gobierno caminda Comision di Retiro mester acepta y procesa tur solicitud, minister Croes a bisa cu el a haya tur sorto di critica te hasta di cierto abogadonan. Pero e mandatario ta argumenta cu el a purba protege trabao y biba di e trahadonan. Ya cu nos ta pasando momento cu no tabatin comparacion, y loke e ta spera di tur hende ta compasion humano pa yuda otro sobrevivi.

Mientras tin hende cu ta bin cu discusion di ley, pero “nos no ta come ley”, segun e mandatario. Logicamente e ta haya cu e ley t’ey pa respet’e, y esey nan a haci unabes cu e veredicto di hues a cay riba un caso entabla pa Romar Trading contra Gobierno.

Awor den margen di nos reglanan, gobierno mester busca solucionnan pa nan keda yuda e famianan cu a perde tur cos. E mandatario ta haya cu como gobierno nan ta yama pa yuda tur hende den momento dificil. Y e ta spera cu tur hende cu den un momento di crisis despues di comprension por bini cu compasion.