Home Local Ainda tin diferencia di genero riba pago di salario

Ainda tin diferencia di genero riba pago di salario

444

A pesar cu nos ta na aña 2018,  ainda tin obhetivo nan pa logra riba pa kico dia di hende muhe ta wordo conmemora. 

Presidente di FTA, Hubert Dirksz ta haya cu ainda ta existi un desigualdad di genero. Ainda tin e diferencia entre homber y hende muhe pa locual ta pago. Pero e lucha tin cu sigui.

P’esey mes riba un dia tan special y pa un ser tan special asina, mester reflexiona pa tur hende ta consciente di con ta celebra e dia aki. Pa e no bira un dia di balor puramente economico, pero un dia di reflexion.

Historia y esencia
E derecho di hende muhe no solamente a bin door di nan habilidad, pero el a bay cu sacrificio. Na 1975, Nacionnan Uni a decreta dia 8 di maart como dia internacional di hende muhe. Esaki ta encera conmemoracion di e accidente tragico cu a tuma luga 8 di Maart 1908 na New York, caminda un cantidad grandi di trahado a protesta den un fabrica di paña pa motibo di e abuso di e dunado di trabou y tambe pa mehora e condicionnan di trabou.

Pa e motibo aki nan a wordo kita for di trabou. Relaciona cu esaki e trahadonan a cera e fabrica y a declara nan mes den welga. Repentinamente a surgi un candela provoca, cual a costa bida di 129 trahado femenino den e fabrica. For di e momento ey a cuminsa un lucha di e movemento di muhenan, cu cada bes  ta haya mas energia.  Cada  bes cu mas legitimidad y mas conviccion pa asina logra e derecho di un ciudadano completo y pa participa cu condicionnan igual riba tur tereno.

E movemento di muhe aki su prome prioridad ta pa desaroya e consciencia di clase y pa e dignidad di un clase trahado femenino. Un otro tarea di e movemento aki tabata pa logra incorpora realmente y activamente muhenan den e circulo social, politico, cultural y economico. Tambe pa asumi un compromiso pa lucha y conkista un trabou di igualdad y dignidad. Tambe mester pone enfasis riba e derecho di hende muhe sin perhudica e derecho di e hombernan.