ORANJESTAD – Recientemente Airbnb cu ta e plataforma digital pa acomodacion y hospitalidad di mas grandi na mundo,hunto cu gobierno di Aruba y Aruba Tourism Authority a firma un acuerdo pa asina sigui cu e impulso pa un turismo sostenibel na Aruba a traves di ‘home sharing’.
“Aruba a experencia un crecemento sostenibel di e sector specifico durante e ultimo añanan y nos ta sinti cu, cu e plataforma di Airbnb nos por yega na un segmento diferente di turistanan cu ta interesa di biba manera e localnan mientras cu nan ta experimenta un banda diferente di nos isla” asina Ronella Tijn-Asjoe Croes, CEO di Aruba Tourism Authority a laga sa.
A traves di Airbnb, turismo pa Aruba ta mas accesibel y ta duna un oportunidad amplio na esnan cu ta busca diversidad den estadia durante nan vacacion. Segun estadistica di Airbnb, durante 2018 e anfitrionnan di Airbnb na Aruba a yama bonbini na un alrededor di 47,200 bishitante cu un estadia di aproximadamente seis dia. E turistanan aki a wordo aloha door di 940 anfitrionnan cu a habri nan porta pa ofrece un experencia diferente di nos isla.
Ta bon pa menciona cu e miembronan di Airbnb na Aruba (esnan cu ta ofrece alohamento na e bishitantenan) ta un grupo hopi diverso: E edad promedio di un ‘host’ tin 48 aña, y 77% di e anfitrionnan tin un edad di entre 30 pa 59 aña. Ademas, un host ta ricibi un entrada anual average di USD $ 9.200,-
E total di e ‘listings’ di Aruba riba e plataforma aki ta 2,300 propiedad.
E plataforma Airbnb a firma e Memorandum of Understanding –MoU- na oficina di gobierno cu presencia di minister di Turismo, Salud Publico y Deporte Danguillaume Oduber, minister di Financia, Asunto Economico y Cultura Xiomara Ruiz-Maduro, CEO di Aruba Tourism Authority Ronella Tjin Asjoe-Croes, y Airbnb Campaign Manager, Public Policy & Communications pa Caribe y Central America Carlos Munoz.
Na e mes momento, e Arubianonan tambe ta eligi Airbnb na momento cu nan biaha pa exterior. Na 2018, 5,100 biahero procedente di Aruba a scoge pa sinti nan mes manera local di e pais ora di biaha.
