Henter mundo ta pendiente di haya sa como ta afecta enorme cambio di direccion di politico – economico Mericano cu awor ta bibando cu yegada di Donald Trump.

Merca ta e principal motor di economia rond di mundo y cu e situacion aki por uza un adagio popular cu ta bisa “ora cu Washington ta nister anto resto di mundo ta coge un flu”, pasobra ta un berdad absoluto. Na America Latino algun pais tin mas mecanismo di proteccion cu otro pais di continente aki. Algun di nan tin menos posibilidad pa enfrenta algun efecto economico cu lo bin for “era Trump” Pero, cual paisnan di Latino America ta mas debil relaciona cu e gobierno nobo di Merca?

E gran problema ta Mexico
Pa ehempel na materia comercial, mexico ta e pais di Latino America mas dependiente di Merca, pasobra Mexico ta manda un 73% di su exportacion pa su bisiña na Noord. E cantidad di exportacion di Mexico pa Merca ta hopi, relaciona cu otro pais manera Guatemala, cu ta bende na Merca un 40%, so, of Uruguay cu ta destina un 5% di producto di su exportacion pa Merca.

E motibo cu ta permiti situacion aki, ta cu Mercado interno di Mercosur hunto cu un oferta di nan cliente manera China, ta haci posibel cu hopi pais di Latino America no ta depende hopi di Merca. Pa tal motibo esun pais cu no ta depende di manera directa di Merca, no ta sufri menasa di Trump di subi e pago di impuesto pa tur importacion, cu obhetivo di duna un proteccion pa empleo local. Situacion di Mexico ta hopi dificil tocante e sistema di importacion aki. Hopi di nan producto di exportacion, manera automotriz ta competi directamente cu fabrica cu ta funciona na Merca. Trump ta presiona, te via twitter pa tur empresa grandi y multinacional pa disminui exportacion desde Mexico, y asina por cuminsa cu exportacion desde Merca.

Trump ta menasa cu Sali for tratado di comercio liber di America di Noord (NAFTA), cu ta un sistema cu ta garantisa paso liber di producto sin impuesto entre Merca y Mexico. Mexico tin hopi cos pa perde cu Trump. No ta un coincidencia cu den ultimo aña e rate di peso Mexicano a cay desde momento cu Trump tabata mas cerca di sinta den poder.

Cuba ta wardando na expectativa
Ta berdad cu Mexico ta e pais cu mas halto porcentahe di exportacion pa Merca, pero ta existi otro paisnan tambe cu por ta vulnerabel dilanti di algun otro cambio na Washington, y Cuba ta un di nan. Un di mas importante noticia desde fin di 2014 ta e acercamento entre Washington y La Haba, despues cu nan tabata yen di enemistad desde hopi tempo pasa. E inicio di combersacion diplomatico entre Cuba y Merca tabata manera un salbacion pa Cuba. Como resultado di tur problema financiero di Venezuela, cu ta su principal socio na materia di economia y fuente di petroleo barato, Cuba ta busca otro posibel entrada economico pa su nacion y tabata spera cu inversion Mericano por cumpli e papel aki.

Durante campaña electoral di Trump tabata casi mesun cantidad e grupo di Cubano cu tabata apoya, relaciona cu grupo cu tabata opone pa re activa relacion entre Merca y Cuba. Si Merca continua cu embargo economico manera nan ta haci desde aña 2014, anto ta cla cu Cuba tin hopi cos pa perde durante gobierno di Donald Trump.

Dollar
E impacto economico di Merca riba America Latino por sinti di diferente manera. Pero dollar ta un protagonista seguro. Un restriccion pa migrante cu no tin documento di identidad y e placa na dollar cu Latino ta manda pa su paisnan, por ta un golpi fuerte pa hopi pais. E situacion por afecta duro pais manera Guatemala, Honduras y El Salvador, pasobra nan ta probecha e oportunidad y cupo di trabao cu mercado Mericano ta dune, y asina por scapa di desempleo cu ta biba na su pais di origen. Di otro banda ta e papel cu ta hunga e dollar manera un moneda muy comun den region aki.

Algun analista ta kere cu e sistema politico di Trump, hunto cu aumento di placa pa obra publica y defensa y un reduccion di impuesto lo provoca un inflacion na Merca. E situacion aki por obliga cu Banco Central independiente di Merca, Reserva federal por subi e indice di interes pa combati e inflacion. Pero cu porcentahe di interes mas halto, anto ta mas atractivo pa inverti na Merca, y e situacion por origina hopi placa for di otro pais pa noord, lagando un evaluacion nobo di dollar.

Un cambio na dollar por tin un impacto halto den pais di Latino America cu ta uza dollar como un moneda oficial: Panama, El Salvador y Ecuador. Si dollar ta subi, anto Ecuador por mira un aumento na nan exportacion, por bira mas caro pa nan clientenan. Contrario na caso di Colombia, caminda nan exportacion por bira mas barata. Esaki por tin un efecto negativo riba manu-factura local.

Situacion aki ta mustra hopi consecuencia for era nobo di Trump na economia Latino Americano. Pesey region di Latino America ta hopi interesa riba publicacion cu Donald Trump ta haci riba su twitter, pasobra nan sa cu tur decision cu Trump ta publica eynan por tin un efecto importante pa nan economia.