image.jpeg

Mientras cu e discusion entre e partidonan encuanto all-inclusive ta continua, e ta kita bista for di otro asunto cu ta exigi nos atencion. Esey ta e discusion – no nobo tampoco – tocante e cantidad di camber den totalidad cu nos ta considera saludabel pa nos economia. Den esaki nos mester tuma na cuenta tanto desaroyo internacional como aki na Aruba mes. Riba nivel internacional (y regional) nos ta mira e aumento di competencia den nos region, unda principalmente e surgimento di Cuba ta un factor di importancia cu tur otro pais mester tuma na cuenta.

E demanda creciente di all-inclusive den tur pais ta otro aspecto, cu a hiba nos na e debate actual, unda tur ta reconoce cu nos mester haci algo, pero e diferencia di opinion ta mas bien riba kico y con ta haci. Ta mas cu claro cu tin dos extremo cu nos mester evita: nos no por atende solamente e interesnan comercial pafo di e hotelnan, limitando e ultimo nan aki den e forma di haci negoshi. Si tin mas demanda pa all-inclusive na nivel general, nos no por simplemente bisa cu nan no por atende e demanda aki. Basicamente tur interesado ta di acuerdo cu algo mester sucede, pero e forma radical den cual e ministro ta desea di ranca tur poder di decision trece na su despacho ta loke ta lanta preocupacion.

Pero aparte cu e debate aki ta tuma atencion merecidamente, e ta causa tambe cu ta kita atencion di otro tema cu (atrobe) mester di nos atencion. Esey ta e asunto di kico ta e desaroyo sano cu nos ta mira pa nos turismo en general pa loke ta cantidad di camber y di ki calidad. Un di e problemanan principal cu nos ta señala ta cu e ministro concerni no ta actua nada diferente cu su predecesornan. Ignorando consehonan duna na 2010 caba pa un comision cu e mes a instala pa considera un moratorio, en bista di e cantidad grandi di proyecto den planificacion caba cu tabata dificil pa para. E mensahe tabata cu e ministro no tabata desea moratorio, muy probablemente pasobra como  ‘bon politico’ e kier a tene tur opcion habri pa e atende esun cu e ta desea. Aparte di esey den e proceso di obtene permiso pa acomodacion turistico e no tin tanto di bisa, pasobra ta e ministro encarga cu infrastructura ta marca e paso te awe.

Con tal cu den e añanan despues nos a mira loke a sucede: aumento di camber di hotel limita, no pasobra no a purba, sino cu tabatin otro factor cu a hunga un papel (Bushiri, Bahia,p.e.), y un crecemento substancial di condominio y di acomodacion alternativo riba henter e isla na un manera no controla. Na e momento aki, manera AHATA a mustra cu cifra, no ta e sector hotelero tradicional ta crece, cu of sin all-inclusive, pero e sector di acomodacion alternativo. Esey tin su bon y su malo. Bon ta cu e ta un estimulo di e empresario chikito y mediano den sector turistico, unda nan tin tur derecho di existencia mescos na tur pais di mundo. E problema ta (atrobe) cu gobernacion ta ‘nowhere to be seen’ den su papel obligatorio di regula e desaroyo aki. Claro cu e ta competencia fuerte pa e sector hotelero estableci pero nos opinion ta cu tur dos por tin nan espacio. 

Un problema sin embargo ta cu e ministro encarga cu turismo mes no ta duna bastante indicacion ta den cual direccion e ta desea di bay. Aparte di e casi mil camber cu tabatin den mente pa Bahia na Sero Colorado, a bin cu e plan fuera di e mundo aki pa concede otro lotenan mas na cabes di Aruba, cu un total di 2500 camber incluyendo Bahia. Ta bon cu no kier a bisa nomber di esnan cu a sinta pensa semehante locura, pero nos por laga nan dal den e muraya di realidad economico, unda ‘common sense’ no a logra para nan. Igualmente nos por comprende cu conseho di ministro no ta apoya e plan pa un hotel na Savaneta, loke ta di aprecia pero talbes pa otro motibo. Si Aruba ta lider regional den ‘sostenibilidad’ y bo ministro ta bin cu un plan pa traha hotel den e unico reserva forestal di mangel cu nos tin, e contesta mester tabata un “NO” cla y raspa for di cuminsamento. Si e ministro no sa ‘google’ e por puntra su colega di infrastructura yuda su persona cu esey pa e por haya un impresion di e destruccion cu industria di hotel ta causando mundialmente den area di reserva costera valioso.

Si e ministro banda di su astucia di custumber tambe por sorprende nos de bes en cuando cu prueba di sentido comun e lo por ta mas exitoso (ainda). Recomendacion: ban regla e asunto di all-inclusive sin cu e mester bira un guera di trinchera unda niun hende ta hala tras pa no perde cara. Pero ban papia tambe di e rumbo general di nos turismo.

LEAVE A REPLY

Please enter your comment!
Please enter your name here