Ayera atardi, durante un reunion Publico na Parlamento di Aruba cu e presencia di prome minister Evelyn Wever-Croes, minister di Salud Dangui Oduber y miembronan di Crisis Team, parlamentarionan a trece dilanti nan preguntanan tanto pa minister Oduber como pa Departamento di Salubridad Publico (DVG) y Crisis Team, tocante con nan ta manehando e situacion di pandemia Covid-19 na Aruba na e momentonan aki.

Un cantidad di 80 pregunta a wordo haci na miembronan di Crisis Team y ministernan presente. Alto Comisario di Cuerpo di Polis, Vanessa Tjon Kock a contesta un pregunta di parlamentario di partido POR, Alan Howell tocante con e situacion ta na e momentonan aki na Cuerpo di Polis di Aruba pa loke ta trata casonan di Covid-19. Tjon Kock a sigura cu actualmente nan tin 56 caso positivo, di e cual 34 persona a recupera 22 caso ta activo ainda.

El a expresa cu Covid-19 a drenta na cuerpo policial na luna di augustus, loke ta nifica cu maneho den departamento aki ya caba tabata delinea na luna di maart, ora e prome caso a keda conoci. Den e maneho a proyecta diferente escenario na momento tambe cu nan ta haya contagio. Por ehemplo, den sector di San Nicolas, caminda cu cierto momento mester a parti e personal pa diferente localidadnan. Esaki ta tipo di accionnan cu mester a tuma luga a base di e maneho cu nan a implementa desde maart ora e crisis a cuminsa.

Tambe el a menciona e presion cu cuerpo policial ta hayando na e momentonan aki, cu segun el a sigura ta masha grandi, pa motibo cu esunnan cu ta haci control y parti boet ta cuerpo policial y no tin otro. Den e caso aki cu ta papia di un crisis, cu nan tin un rol hopi importante cu automaticamente ta bira un prioridad, “siempre y cuando bo tin den mente cu procesonan principal no por bay plat”. Por ehemplo esunnan di orden publico, e parti hudicial cu ta principal den cuerpo policial.

Tin diferente proceso den e departamento aki, manera Tjon Kock a splica, cu mester wordo adapta pa motibo cu aworaki tin un situacion di crisis. Por ehemplo tin toque de queda y mester di personal pa controla cumplimento di esaki. Tin cu adapta otro tipo di proceso pa e personal aki por haci nan trabou di control durante toque de queda.

E parti principal cu Tjon Kock a declara ta cu nan tin cu por ofrece e visibilidad y cu mester por t’ey ora ta trata di orden publico. “Ni den un caso di crisis no por para esey.” Y door di e maneho cu nan a delinea, nan a tene cuenta cu nan por haya un situacion na unda tin cu ‘schaal op’ y esey ta e tipo di escenario cu a wordo implementa.

Tocante maneho riba manifestacion, un pregunta cu parlamentario y lider di fraccion di partido MEP, Rocco Tjon a puntra, alto comisario a indica cu esaki ta un di e puntonan cu a wordo discuti hunto cu Ministerio Publico, pa motibo cu un manifestacion ta loke nan ta yama un derecho fundamental. Por ehemplo, el a trece dilanti e criticanan cu mayoria di biaha nan ta haya den ora di un manifestacion, cu tin un sameschooling y pakico e momento ey polis no ta actua.

Mirando cu esaki ta un derecho fundamental, Tjon Kock a bisa cu nan mester tene cuenta cu nan no por impedi pa esey tuma luga. Loke si mester tene cuenta cune ta cu polis tin autoridad y e manifestacion en cuestion tin cu wordo regula y controla. Por ta e caso cu nan por haya cu un disturbio di orden publico y e momento ey, semper cuerpo policial por actua.

Pa loke ta trata e manifestacion cu te ainda via rednan social ta wordo plania pa mañan, dia 30 di september, el a dirigi algun palabra pa esunnan cu lo kier haci esaki, bisando pa tuma contacto cu cuerpo policial. Esaki pa motibo cu nan tin un derecho fundamental, pero no tin cu lubida cu tambe tin autoridad y esey ta keda pa cuerpo policial. Teniendo cuenta cu manifestacion y cumplimento di ley tin cu cana den manera corecto.