Entrante awe parkeo na e ciudad di Amsterdam ta conoce un subida di 2,50 euro pa un total di 7,50 euro pa ora. Cu esaki Amsterdam ta sigui di ta e ciudad mas caro pa para auto.
E subida di prijs di parkeo tabata un acuerdo cu e coalicion actual y e ta e prome subida den 8 aña. E intencion su tras ta pa hende haci mas uzo di transporte publico of pa haci mas uzo di e zonanan di P+R, cual ta keda un poco mas pafo di e ciudad.
Parkeo ta genera pa aña alrededor di 200 miyon di euro pa e ciudad di Amsterdam. Di e placa aki, mas o menos 32 miyon ta bay na e gastonan pa haci control. Gran parti di e sobra di placa ta wordo uza pa mehora infrastrcutura.
Aruba
Aki na Aruba tambe e tema di parkeo ta keda uno “delicado”. Desde introduccion di AruParking, tabata tin hopi argumento pro y contra, como tambe e tabata un punto di discusion durante campaña electoral.
Sinembargo te dia di awe no ta conoci kico e futuro lo ta pa parkeo na Aruba. Na inicio a haci uzo di fondo di ARUBUS pa pone e compania riba pia y te na e ultimo informacion cu nos matutino tin, esaki a draai den perdida solamente. Director di AruParking tambe a retira y a conoce varios cambio den e structura (kitamento di klem) y orario cu ta controla.
Kico exactamente ta e situacion di Aruparking no ta conoci. E lo keda? E lo wordo kita? Con lo haci cu e parti financiero? Ta yega momento pa gobierno di Aruba, specialmente e Minister di Transporte, sali y splica e situacion real y bisa kico lo bay haci cu e compania di AruParking.
