Un persona cu bo conoce ta conta bo di un manera facil pa gana placa. Bo djis mester bo celular, bo por traha for di cas completando tareanan simpel online y ricibi pago. Bo por hasta conoce hende cu ya a gana placa. E ta zona atractivo, specialmente pasobra bida diario a bira asina caro.

Asina ta con plataformanan manera Quick Promo ta hala atencion.
Pero desaroyonan recien na Corsou y Aruba a lanta preocupacion serio. Banconan Central a adverti pueblo tocante Quick Promo, y hopi participante awo ta preocupa pa nan placa.

Pa compronde pakico, prome nos mester compronde con e sistemanan financiero aki ta funciona.

Kico Quick Promo tabata ofrece?

Quick Promo a presenta su mes como un manera pa gana placa haciendo actividad promocional simpel online. Participantenan tabata paga pa join, y a priminti nan di gana placa completando tarea. Nan tambe por a ricibi recompensa pa trece otro hende den e plataforma.

Paga placa den un sistema asina yama “deposito”. E placa cu un hende ta spera di gana lo ta e “rendimento.”

Pero di unda e placa pa paga e participantenan ta bin?
Un negoshi normal ta gana placa bendiendo producto of servicio. E ta usa parti di e entrada pa paga su gasto. Si un plataforma priminti pago grandi pa tarea hopi simpel, nos mester cuestiona si e tareanan ey realmente ta produci suficiente entrada pa paga tur hende.

Aki ta unda programa di pyramid y Ponzi ta bira importante.

Estafa di pyramid y Ponzi

Un estafa di pyramid ta depende riba trece hende nobo den un sistema. Hende por paga pa join y ricibi recompensa pa recluta otronan. Placa di participante nobo ta sostene pago pa e participantenan anterior.

Un estafa Ponzi ta un tiki diferente. E ta priminti hende rendimento riba nan inversion, pero en bes di gana suficiente ganashi real, e organisador ta usa placa di inversionista nobo pa paga esunnan prome.

Ambos sistema ta crea apariencia di un negoshi exitoso.

Imagina 10 persona, cada un ta deposita 100 florin. E organisador awo tin mil. E organisador ta usa Afl. 300 pa paga algun di e prome inversionistanan. E hendenan ey ta ricibi placa real. Nan lo bisa famia y amigo cu e sistema ta traha. Mas hende ta join, treciendo mas placa.

Pero e pago no ta bin di un negoshi rendabel, sino di e otro participantenan. Eventualmente, e sistema mester mas y mas placa nobo pa sigui paga tur hende. Ora e depositonan nobo ta cuminsa slow, por bira imposible pa paga loke a priminti. Asina e sistema ta collapse.

E banconan central a identifica señal di advertencia asocia cu estafa di pyramid den Quick Promo. Sinembargo, e forma legal exacto di e operacion y e responsabilidad pa posible crimen mester keda estableci a traves di e investigacionnan apropia.

Pakico hende ta cay p’e?

Ta facil pa critica hende ora cos bay malo. Pero imagina bo amigo ta mustra bo placa ricibi di un plataforma. Bo primo ta participando, bo colecta ta bisa e pagonan ta yega regularmente. Bo ta cuminsa pensa cu e oportunidad ta safe. Esaki yama “prueba social.”

E ta nifica cu nos ta confia algo mas ora nos wak otro hende ta hacie. Y ora un persona haya un pago inicial, e sistema ta mustra mas convincente.

Pero haya placa un biaha no ta proba cu un negoshi por sigui paga tur hende.
Un screenshot mustrando yen placa den banco tampoco ta prueba cu por realmente saca e placa.

Nos mester corda cu hende tin diferente motibo pa busca entrada extra. Algun kier paga debe, otro sostene nan famia of spaar pa futuro.
Compronde pakico hende a join ta mas util cu pone nan sinti berguensa.

Kico a pasa na Corsou y Aruba?

Dia 17 di september, Banco Central di Corsou y Sint Maarten (CBCS) a adverti tocante Quick Promo y otro programa mustrando caracteristica di estafa di pyramid.
E situacion a bira mas serio na november.

Segun CBCS, Quick Promo a bisa participantenan cu nan mester deposita otro 300 dollar dentro di 72 ora pa verifica nan cuenta. Esnan cu no paga tabata den riesgo di perde acceso na nan cuenta y nan placa.

CBCS a adverti cu esaki por indica problema financiero serio. Tambe a splica cu paga mas placa no ta duna garantia di recupera un deposito anterior.

Reportahenan di Corsou a describi participantenan hayando dificultad pa haya acceso na nan placa, mientras tabata purba haya sa cuanto hende ta afecta.

Banco Central di Aruba tambe a duna advertencia tocante Quick Promo Aruba, declarando cu e no ta registra cu Camara di Comercio (KvK) ni Banco Central, y consehando hende pa tuma contacto cu polis.

Banconan central ta responsable pa supervision financiero – kiermen tira bisa riba cierto actividad financiero y check si negoshi ta cumpli cu reglanan pa protege pueblo. Sinembargo, un advertencia di banco central no ta nifica automaticamente cu tur persona conecta na un plataforma a comete un crimen.

Hende por haya nan placa back?

Esaki por ta e parti mas doloroso. Imagina bo deposita mil florin den un plataforma. Despues, bo cuenta ta mustra dos mil florin. Pero ora bo purba lanta e placa, e plataforma ta nenga. E number riba e pantaya no ta nifica necesariamente cu tin Afl. 2000 un caminda wardando pa bo.

Si ya a gasta, transferi of usa e deposito pa paga otro participante, no tin suficiente placa resta pa paga tur hende.

E habilidad pa paga placa cu ta debe ta conecta na e termino financiero “likides”.

Den palabra simpel, likides kiermen tin placa disponible ora ta necesario.

Un plataforma por bisa cu su participantenan a gana sumanan grandi sin tin e placa pa paga nan.

Si participantenan di Quick Promo por recupera nan deposito ta depende riba kico investigadornan descubri, incluyendo unda e placa a bay, y si tin fondo a resta.

Advertencia di Banco Central no kiermen cu e banco por djis duna tur hende nan placa back.

Kico nos por siña?

Tin señal di advertencia cu tur hende mester reconoce. Sea cauteloso ora un persona priminti ganashi enorme pa tiki trabao. Haci pregunta ora mester paga placa prome cu cuminsa gana, specialmente ora bo ta curasha pa recluta otro. Sea specialmente cauteloso si ta ser bisa pa deposita mas placa prome cu por lanta loke supuestamente ta pertenece na bo persona.

Cualkier persona afecta mester wanta recibo di pago, mensahe y informacion di cuenta, y sigui e instruccionnan duna pa autoridadnan. Mas importante, no asumi cu algo ta safe djis pasobra un persona cu bo ta confia ya a cobra placa.

E controversia di Quick Promo ta recorda nos pakico educacion financiero ta importante.

Nos tur kier oportunidad pa mehora nos bida. Pero compronde con ta gana placa, di unda pago ta bin, y ki riesgo ta envolvi por protege nos di perdida serio.