Un investigacion di Delft University of Technology (TU Delft) ta revela cambionan den costa di Aruba entre 2016 y 2023, incluyendo aumento di construccion y variacion den liña costero y vegetacion.

E estudio a identifica aproximadamente 26.000 meter cuadra di aumento den superficie di construccion detecta den dos zona costero. Sinembargo, e investigacion no ta establece un relacion directo entre construccion y e cambionan den liña costero.

E investigacion, titula “Coastal Change in Aruba and Bonaire: A Remote Sensing Assessment of Shoreline Change, Development, and Vegetation”, a ser realisa door di Josephine Winterdal, relaciona cu Facultad di Arquitectura y Ambiente Construi di TU Delft. E investigacion ta analisa con diferente zona costero na Aruba y Boneiro a cambia durante un periodo di ocho aña, uzando imagen di satelite y informacion geografico pa identifica diferencia den posicion di costa, construccion y vegetacion.

E investigacion ta concentra riba seis zona costero, di cual tres ta situa na Aruba y tres na Boneiro. Pa Aruba, e zonanan selecciona ta representa tres ambiente diferente: un zona di beach na parti west di e isla, cu un concentracion halto di hotel y infrastructura turistico; un zona na parti zuidwest, caracterisa pa vegetacion costero y mangel; y un zona di piedra na e parti oost, cu relativamente poco construccion y exposicion directo na lama.

E seleccion di e zonanan no ta representa full e costa di Aruba. E meta di e investigacion tabata pa compara localidadnan cu diferente caracteristica natural y nivel di desaroyo, pa determina con e cambionan observa ta varia entre nan.

Un di e resultadonan mas notable ta e aumento di superficie di construccion detecta den e zonanan cu ya tabatin actividad urbano. Den e prome zona, situa na e costa west cu beachnan cu santo y concentracion di hotel, e investigacion a identifica un aumento di aproximadamente 15.027 meter cuadra den superficie di construccion entre 2016 y 2023.

Den e di dos zona, situa na e costa zuidwest y caracterisa pa mangel y desaroyo residencial, e aumento registra tabata aproximadamente 11.037 meter cuadra. Hunto, e dos zonanan aki ta representa un aumento neto di 26.064 meter cuadra den superficie di construccion detecta.

E cifranan ta referi na superficie ocupa pa construccion segun e datonan analisa, y no necesariamente na cantidad di edificio nobo construi. E investigacion tampoco ta presenta e aumento como un total di construccion pa henter Aruba, sino exclusivamente pa e zonanan selecciona.

Den e di tres zona, situa na costa cu piedra di e parti oost di 3 isla, no a registra un cambio neto den superficie di construccion detecta. E resultado aki ta contrasta cu e desaroyo observa den e otro dos zonanan y ta refleha e diferencia entre e ambientenan costero investiga.

Ademas di construccion, e investigacion a examina cambionan den posicion di e liña di costa uzando imagen di satelite di diferente aña. Pa determina e variacionnan, e investigacion a compara posicion di e limite entre lama y tera durante diferente periodo.

Den e prome zona na costa west, e resultado a indica un desplazamento promedio di e liña di costa den direccion di tera di 4,72 meter den e serie di observacionnan di un temporada y 8,36 meter den e otro serie. E investigacion a identifica tambe cambionan mas notable den cierto partinan di costa, particularmente den zonanan caminda liña di costa ta forma un curva.

Sinembargo, e cifranan aki no por ser interpreta automaticamente manera prueba cu beachnan a perde e cantidad di meter menciona. E investigacion ta enfatisa cu posicion di liña di costa detecta mediante imagen di satelite por ser influencia pa condicion di lama, nivel di awa, nubia y otro factor cu por influencia e exactitud di e midimento.

E diferencia ta importante particularmente pa e prome zona, caminda e estudio a identifica tanto aumento di construccion como variacion den liña di costa. Aunke ambos desaroyo ta sucede den e mesun area, e investigacion no a determina cu un ta causa e otro.

Den e di dos zona, cu ta inclui ambiente di mangel, e resultado tabata diferente. E investigacion a registra un desplazamento promedio di 0,11 meter den direccion di lama den un serie di observacion y 4,32 meter den e otro. E cifranan ta indica un posicion detecta un tiki mas afo di costa, pero nan tambe ta suheto na incertidumbre di e metodo uza.

E presencia di mangel, awa poco profundo y formacionnan costero chikito por influencia e manera cu satelite ta identifica e separacion entre tera y lama. Pa e motibo aki, algun diferencia observa por ta relaciona cu e proceso di deteccion y no necesariamente cu un cambio fisico real den e costa.

Den e di tres zona, caracterisa pa costa cu baranca y exposicion directo na ola, e investigacion a registra un desplazamento promedio di 0,25 meter den direccion di tera den un serie di observacion y 11,14 meter den e otro.

Aunke e ultimo cifra ta relativamente halto, e investigacion ta adverti cu e presencia di scuma di ola por afecta e identificacion automatico di e liña di costa. Den zonanan cu baranca, e limite detecta entre awa y tera no necesariamente ta representa un cambio real den posicion di e formacionnan natural.

Pa evalua exactitud di e metodo, e investigacion a uza 603 punto di referencia interpreta manualmente. E evaluacion a identifica margennan di eror cu, pa e zonanan di Aruba, tabata entre 6,29 y 10,79 meter. Esaki ta nifica cu algun di e desplazamentonan promedio calcula ta compara cu e margen di eror di e midimentonan.

E limitacion aki ta haci necesario pa trata e resultadonan cu cuidao, specialmente ora ta interpreta e cifranan manera posible indicacion di erosion of acumulacion di material costero.

Otro aspecto importante di e investigacion ta e cambionan den vegetacion. Den tur tres zona costero di Aruba, e imagen di satelite a identifica un aumento neto den superficie clasifica manera vegetacion entre 2016 y 2023.

Den e prome zona, e aumento detecta tabata aproximadamente 16.370 meter cuadra. Den e di dos zona, caminda mangel ta forma parti importante di e ambiente natural, e aumento tabata aproximadamente 65.110 meter cuadra. Den e di tres zona cu piedra, e investigacion a identifica un aumento di aproximadamente 26.525 meter cuadra.

E di dos zona a registra e aumento mas grandi di vegetacion entre e tres localidadnan di Aruba. Sinembargo, e investigacion ta aclaria cu un aumento den superficie identifica como vegetacion no necesariamente ta nifica cu calidad ecologico di e ambiente a mehora.

E metodo uza ta identifica vegetacion a traves di caracteristica di imagen di satelite, pero no ta determina directamente estado di salud di mata, biodiversidad of funcionamento di ecosistema. Den caso di mangel, por ehempel, condicion di awa, nivel di salo y acumulacion di sedimento ta representa factornan importante cu no por ser evalua solamente mediante superficie di vegetacion detecta.

E comparacion cu Boneiro ta mustra cu e cambionan costero no ta sigui un patronchi uniforme. Mientras cu algun zona ta registra aumento di construccion y desplazamento di liña di costa den direccion di tera, otro ta presenta cambionan diferente, dependiendo di caracteristica natural y condicionnan local.

E investigacion a determina cu no tin un relacion consistente entre intensidad di construccion, cambio den vegetacion y desplazamento di liña di costa. Zonanan cu mas desaroyo urbano no necesariamente ta registra e variacionnan mas grandi, mientras cu localidadnan cu poco construccion tambe por presenta diferencia den e posicion di costa detecta.

Segun e analisis, e resultadonan ta confirma importancia di evalua cada zona costero individualmente, considerando su caracteristica geografico, exposicion na ola, presencia di vegetacion y nivel di desaroyo.

E estudio ta recomenda pa futuro investigacionnan combina imagen di satelite cu observacionnan directo den tereno, pa por determina cu miho precision si e cambionan identifica ta representa modificacionnan fisico real.

Tambe ta recomenda pa considera condicion di lama y nivel di awa durante seleccion di imagen, y pa uza imagen di resolucion mas halto pa verifica resultadonan den localidadnan caminda e midimento ta presenta incertidumbre.

Den caso di Aruba, e investigacion ta menciona importancia di considera haltura di edificionan den futuro analisis di desaroyo costero. E metodo actual ta registra principalmente superficie ocupa pa construccion, pero no ta refleha completamente intensidad di desaroyo den zonanan turistico cu edificionan di varios piso.

E resultadonan por contribui na identifica localidadnan caminda ta necesario pa realisa investigacion adicional y mantene un monitoreo mas detaya di cambionan costero. Sinembargo, e estudio no ta presenta un clasificacion di e zonanan cu riesgo mas grandi, ni ta determina cu e localidadnan investiga ta enfrenta un peliger inmediato.