Comunidad di Aruba a sostene casi 5000 famia cu cuminda pa tres luna. Y awor Hulanda tambe a cuminza yuda. Asina Andreina Dirks, Secretaria di Fundacion pa Nos Comunidad a bisa Bon Dia Aruba.

FPNC ta e unico banco di cuminda di Aruba y tin mas di 10 aña ta yuda famianan cu asistencia di pobresa. Pero ta papia di un asistencia na 250 famia y desde mita di maart ta yudando 4,700 famia. Y te cu siman pasa, e paketenan aki ta danki na contribucion di comunidad di Aruba. Mita di e cantidad di pakete di cuminda desde siman pasa ta bay pa famianan den problema agudo, ta danki na sosten financiero di Hulanda.

FPNC nunca a pensa di a bira locual ta considera un ‘lifeline’ pa miles di Arubiano, Dirks a bisa.

“Si no tabata pa donacionnan local, nos nunca lo por a yuda asina hopi hende. Nunca.”

Por ehempel e yudansa di Hulanda a cuminza yega siman pasa. “Y e crisis a cuminza na Maart.”

Asistencia Hulanda

Ministerio pa Asuntonan Interno di Hulanda, BZK a pone fondonan disponibel pa yuda famianan den crisis pa medio di Cruz Cora Hulanda, cu di su banda a traha cu Cruz Cora Aruba. Y Cruz Cora a traha cu organisacionnan local, manera tabata e mandato di BZK. Na Aruba, e unico banco di cuminda oficial ta FPNC. E placa cu Hulanda a duna mester a bay na pakete di cuminda of asina yama vouchers. Y den e caso aki, Cruz Cora ta un partner cu ta coordina y implementa, y FPNC ta un partner di implementa. Y Cede Aruba ta coordina henter e proceso hunto cu Cruz Cora.

FPNC pues ta percura pa e paketenan di cuminda. “Nos no ta haya placa di Hulanda, nos ta haya producto. Cruz Cora ta cumpra e producto pa nos. Nan ta busca e productonan pa medio di un destaho y nos ta haya e productonan pa parti.”

Prome cu Covid19 tabata sirbi 250 famia, cu tabata ricibi pakete di cuminda un biaha pa luna pero tambe tabata den un trayecto di ayudo. Pues banda di cuminda, FPNC tabata brinda nan guia y sosten pa nan por surpasa retonan.

Locual FPNC tabata haci prome cu e crisis di Covid ta asistencia di pobresa. Tabata entrega pakete di cuminda un biaha pa luna, y pan tres biaha pa siman. E enfoke tabata pa e famianan ricibi un cuminda cayente pa dia. “E asistencia di pobresa tin diferente forma, por ehempel cu cuminda, pero tambe proyectonan. Tin mas aspecto mara na bringa pobresa.”

Awor aki FPNC ta netamente dirigi riba ayudo di crisis, esta noodhulp. Esey ta algo diferente. Noodhulp ta encera distribucion di masa. “Nos tin 4700 famia cu ta ricibi pakete di cuminda tur luna, y e ayudo ta dirigi pa sostene e famia. Nos ta den un crisis nacional, y un di e metanan ta pa no yega na disturbio social. Pues mester duna paketenan mas grandi, pa famianan ta mas trankil,” Dirks a splica.

E sosten di pobresa (pre Covid) no ta pa haci e recipientenan mucho confortabel pasobra mester keda cu e estimulo pa nan mes sali di nan situacion. Pero e caso aki ta un crisis nacional y ta diferente. Tin hopi famia cu normalmente no ta cay den e cuido di pobresa. “Nos kier pa nan tin e trankilidad, te ora cu e situacion economico local drecha.”

FPNC tin un lista di rekisito, entre otro cu pa un famia ricibi ayudo, mester duna lista di identificacion di tur hende cu miembro di e famia. Y locual ta importante ta cu ta traha hopi cerca cu otro organisacionnan cu ta brinda sosten di crisis. FPNC ta yama esaki ‘matching.’ E proposito di esaki ta pa sa ken ta esnan cu ta ricibi ayudo, pa no duna cierto famia mas sosten cu e otro. Den otro palabra, e ayudo cu tin mester ta reparti den forma husto pa asina mas hende cu mester por ricibi esaki. “Door di traha cu e como 45 instancianan activo, nos por mira cu no tin famianan cu ta registra dos caminda. Esey ta e ‘matching.’”

Tin hopi organisacion di ayudo a lanta durante e crisis. “Nos no ta traha cu tur, pero si cu hopi.” FPNC ta tene e administracion cua organisacion ta yuda ken y asina sigura cu e reparticion ta cana su caminda. Ta depende e matching, ta determina ken ta keda yuda cua cliente. Por ehempel, FPNC ta traha cu Amigos de Venezuela. “Nos ta e unico instancia cu ta traha cu tur. Nos ta traha cu Claritas, Departamento Social, FCCA, scolnan. Nos ta e unico cu tin tur e lista di tur hende. Esey ta pone cu tin un banco di data central.”

Concentracion di ayudo

E concentracion di ayudo ta mesun forma reparti cu e concentracion di habitante den districto. Den e caso aki, tin mas ayudo pues ta bay pa famianan na Oranjestad, San Nicolas y Noord.

No tur di e famianan cu ta ricibi ayudo di FPNC tin FASE y hasta si tin FASE, toch nan ta bin na remarca pa ayudo. “Si un di e miembronan di e famia tin FASE, mester realisa cu aki ta papia di 950 florin. Dificil pa kere cu henter un famia por biba di esey. Nos ta mira e situacion di e hogar. Mescos cu ta papia di famianan cu ta ricibi asistencia social di Gobierno. Kisas antes nan por a sobrevivi cu e placa. Pero nos a ripara cu hopi yiu cu a perde entrada ta bek na nan famianan y tur mester di depende di e suma chikito.” Mesun situacion ta conta pa pensionadonan cu kisas awor tin cu sostene no solamente nan mes, pero tambe nan yiunan y nietonan. “No ta pasobra bo tin un of otro entrada, no nifica cu no mester di ayudo.”

Asistencia psicologico

FPNC ta brinda asistencia di trahado social na recipientenan di ayudo di pobresa. Sinembargo, e asistencia social/psicologico na tur esnan cu ta ricibi ayudo di crisis awor aki ta casi imposibel mirando con grandi e grupo ta. E ta un realidad cu pa hopi hende, ta prome biaha cu nan ta depende di ayudo di otro y e tin su efectonan psicologico. Esnan cu ta desespera lo haya ayudo, pero “e ta imposibel pa duna e servicio ey na miles di famia. Ta pa e motibo ey mes, ta promove pa e famianan den necesidad yega na un instancia amigo, ya cu e liñanan ta mas cortico asina. Nan ta mas cerca di e persona den necesidad. Por ehempel, esnan cu ta ricibi ayudo di FCCA of Wit Gele Kruis ta mas cerca cu e fundacionnan ey, cu por brinda nan tambe e sosten di un trahado social ora cu nan mester di dje.”

Stress

Na e momentonan aki FPNC ta enfoca riba e distribucion y administracion di ayudo di crisis cu ta tuma tur tempo. “Door cu nos a bay na registra personalmente, nos ta haci uzo di e momento pa evalua e personanan, pa duna nan e sosten emocional cu nan mester. Pa asina midi con halto nan nivel di stress ta y asina toch wak con pa yuda. Pero si mester registra online, no ta topa cu e persona of personanan. Pero e instancia amigo si tin contacto mas directo y por brinda e asistencia. Ta pa esey nos a bay bek na e registro personal. Pasobra nos a ripara tambe cu e nivel di stress a cuminza subi. Na comienzo e tabata halto, hopi hende tabata spanta. Despues el a baha un poco danki na FASE y ora economia local a cuminza draai. Pero awor aki, hopi famia a pasa door di nan reservanan y e presion a bira hopi halto. Awor ta haya problema di huur, awa, coriente y ta asuntonan cu realmente nan no tin caminda pa acudi pa haya ayudo cu e gastonan aki. Esey ta dificil.” Si tabata un caso di cuido di pobresa, FPNC por intermedia, pa yega na un areglo di pago, pero pa 4,700 no por duna e servicio ey,

Back to school

Un di e retonan mas grandi awor ta pa yuda famianan paga e gastonan pa muchanan bolbe scol. Normalmente FPNC ta dedica hopi esfuerso den e proceso aki. Pero e crisis ta asina grandi cu tur recurso, tanto di cuminda, placa y logistica ta dedica na e ayudo di emergencia. “Nos no tin economia local pa carga e proyecto. Nos no tin e donateurnan pa yuda cu e proyecto aki. Nos tin 3000 mucha riba e programa. Nos ta yuda, basa riba cierto criteria. Pero nunca e ta bay ta suficiente. Nos ta papia di mucha y tur mester haya ayudo. “ FPNC ta haya sosten di otro organisacionnan, manera clubnan di servicio y otronan, pero e cantidad cu ta yuda ta limita. Ta papia di 50, of te hasta 100. Pero no pa yega na e cantidad di 3000. Nos lo kier yuda tur 3000 y ta con pa scoge. E ta horribel, pasobra nos ta papia aki di mucha. Sinembargo, nos mester haci escogencia. E trabou aki ta duro,” Andreina a bisa.

Donacion local

Di otro banda, FPNC ta hopi gradecido na Hulanda pero tambe na comunidad di Aruba. “Nos ta hopi contento cu Aruba un biaha mas tabata sa di respalda su unico banco di cuminda. Y no solamente esey, nos a ripara cu e ‘sociale vangnet’ ta hopi fuerte na Aruba. Famianan a sa di respalda otro. Pasobra segun e cifranan di CBS, ta como 15 mil hogar ta afecta pa e perdida di entrada, y entre FPNC y Cruz Cora ta yuda como 8000. Kiermen casi mita di esnan afecta ta hayando ayudo di otro forma.”

E paketenan te cu awor mester ta reparti pa 18 di September y FPNC a compronde cu Hulanda ta preparando pa otro asistencia pa fin di aña, pero esey no ta oficial ainda.

FPNC ta habri pa contribucion y por haci esaki na Aruba Bank 1000,

Banco di Caribe 100 000 500 001 800 01, Caribbean Mercantile Bank 60001000, y RBC Royal Bank 77000 000 44195025. Pa mas informacion, por bishita e website, fpnc.aw, e-mail info@fpnc.aw of yama 588-0002

 

LEAVE A REPLY

Please enter your comment!
Please enter your name here