Ayera atardi, e grupo contra abuso sexual di mucha Ta Basta a uni cu Reginald Danies den e lucha cu e cual e tin algun dianan caba para banda di parlamento.

Joshua Gonzalez a expresa pa Bon Dia Aruba cu esaki ta pa motibo cu nan kier stop cu e polemica cu den dianan aki a surgi, cu a pone tur hende contra otro. Y nan kier sigui evita confrontacion, pa via cu nan pelea ta contra gobierno, y ta p’esey cu nan a dicidi di uni cu Reginald Danies.

Ademas, el a bisa cu awe nan tin un reunion cu minister pa loke ta trata e puntonan di e manifiesto cu nan a entrega dia 3 di juli den nan manifestacion. Di mesun manera el a informa cu nan a haya un permiso pa dia 14 di augustus 5.30 di atardi lo haci otro manifestacion dilanti parlamento, pa pone mas presion riba gobierno.

Ademas, Gonzalez a menciona cu nan ta bin papia cu hopi instancia y nan a manda tambe varios carta pa Hulanda, pa asina nan por haya oido di gobierno di Aruba mes. Esaki pa motibo cu e mes a sigura cu “pa via di e cartanan nos ta bisa cu gobierno no ta scucha nos y ta esey loke Gobierno no kier, pa nan no haya mas problema di loke nan tin. Pero door cu ta campaña nos no por confia tampoco den nan palabra”.