Antoine Geerman, artista di tattoo: ‘Mi a keda pusha mi mes pa mehora’

ORANJESTAD – Bon Dia Aruba a entrevista artista local di tattoo, Antoine Geerman, kende ta splica su interes pa bira un artista di tattoo, y con el a keda sigui su caminda pa logra locual e tabata kier.

E ta bisa cu for di tempo e ta chikito, el a haya un buki di sticker for di un familiar. E sticker cu diseño chikito di ‘skulls’, aguila, bala di biyar cu candela patras, ‘di biaha mi a haya interes den e estilo ey’.

Geerman ta continua splica cu di eynan el a cuminsa pinta nan mescos, pero mas grandi. Despues, e mes na su tempo a cuminsa haci ‘investigacion di e diseño’ y el a ripara cu tin tattoo di tur e diseño cu e tabata wak. Sinembargo, Geerman ta splica cu el a lanta den un famia ‘Cristian, anto tattoo semper tabata un no’.

Sinembargo, e mes ta agrega cu no tabata tin interes den dje, anto el a continua den su pintamento anto admira su arte. Ora el a bira mas grandi ta na unda el a dicidi di pone su prome tattoo. E ta remarca cu sin importa e parti di religion. “For di mi prome tattoo, mi a keda encanta.”

Geerman ta splica cu for di eynan, cada luna e tabata keda pone un otro tattoo. “Cada tattoo cu mi a pone, mi ta corda cu mi tabata puntra e artista kico tur e ta haci, mi ta observa tur cos. Pero sin e pensamento di cu ami mes lo kier bira un artista, e tabata mas pa motibo cu mi ta haya esey interesante.”

Segun Geerman ta splica, e tabata interesa den e proceso di con pa tin algo pa henter bida ta bay. Pa locual ta pinta, e ta splica cu el a keda un aña sin bay scol, pa motibo di keda for di atardi te cu madruga, te hasta e siguiente dia, ta pinta so.

Geerman a tuma e decision di stop cu su estudio y cuminsa cu su pasion. “Mi a cuminsa cu Grafisch Lyceum, un direccion pa arte y diseño. Mi mentalidad a expande asina tanto bibando na Hulanda, y tattoo a bira mi pasion.”

E ta continua splica cu el a cumpra su prome tattoo kit, el a cuminsa prik su mes pa asina practica riba su mes y su conoshinan. E ta remarca e tin algun tattoo di tempo mas hoben cu lo drecha awo. Via su scol, el a logra haya un stage plek. E hefe y artista di e luga a tuma Geerman como su aprendis, e ta agrega cu e hefe a ripara e interes, e pasion y potencial di dje.

Segun Geerman, el a pasa duro den e tattoo shop. “Mi mester a bari, mop y haci limpi tur dia, pero mi a wordo recompensa cu conocemento. Mi a gusta.” Geerman ta agrega cu prome cu el a core su stage eynan, el a aplica hopi caminda y nan tur a bisa cu nan no ta tum’e.

Geerman ta remarca cu mas nan a bis’e cu no, mas el a sigui pusha pa e haya un si. “Mi a sigui pusha mi mes, pa motibo cu mi kier a mehora mi pinturanan. Tur dia mi a siña tecnica nobo. Nunca mi a stop. No tabata facil, ainda e no ta. E ta un wega duro, pero mester ta duro.”

Bon Dia Aruba a puntra Geerman e diferencia cu awo cu e ta den posicion manera un artista, cu antes ora e tabata wak e artista haci e tattoo. E ta contesta cu awo e no ta esun sufriendo, ‘mi ta sinti mi a haya mi luga’.

“Mi ta haciendo locual mi gusta y e ta nice pa wak mi pintura riba un hende. E ta manera un canvas cu pia. Mi ta haciendo arte pa un publico henter. Antes mi tabata haci e riba papel, pero semper mi tabata pinta algo cu e pensamento di con master e pintura aki lo mustra riba un persona, y e tipo di arte cu e por tin pa semper”, Geerman ta splica.

Manera un artista di tattoo, ora hende yega cerca dje, hende ta prefera un tattoo chikito of grandi? E ta contesta cu hende, ora nan kier pone nan prome tattoo, ta prefera algo chikito. “E ta varia den 3 cos. Nan kier wanta menos dolor, e por ta motibo nan di trabou, y tin hende kier un tattoo djis pa nan so por wak.”

Segun Geerman, ora un persona pone un tattoo, ta pa separa di mayoria di hende. “Ami ta kere e persona ta haci esey consciente. E kier separa su mes. E persona no lo worry e ora pa otro hende wak e of no. Pero si sa pasa cu e persona ta sconde for di hende specifico, manera mayornan of famia. Esey ta djis den cultura y mas pa respet. Pero na final di dia, ta bo curpa y bo decision. Mi lo bisa, si haci un tattoo consciente y cu un edad apropia, sea pa esunnan hoben tende for di nan mayornan te ora nan tin un edad avansa.”

 

You May Also Like

Coleccion di 1500 palabra masha poco uza riba website di ANA

Diahuebs ultimo, Lucia Kelly a realisa e presentacion di un trabou cu ta bin ...

30meiNG NOBOMinister Hooyboer.jpg

Minister Michelle Hooyboer-Winklaar: Trato husto pa nos studiante semper mester prevalece

Diabierna dia 27 di mei ultimo Minister di Enseñansa Michelle Hooyboer-Winklaar a aproba e ...

Gobierno lo purba recupera ‘algo’ di e debe cu Mio a laga

Gobierno ta purbando pa recupera algun debenan habri cu Mio a laga atras despues ...

Bursalen a biaha ayera pa Hulanda

Ayera mainta e studiantenan conoci den boca di pueblo manera ‘bursalen’, a presenta na ...

Reunion intensivo tumando luga pa formalisa gobierno nobo

E politico di POR y parlamentario, Andin Bikker a bisa cu e proceso di ...

Codigo nacional enseñansa

Codigo di comportacion nacional pa tur scol

Despues di varios incidente na scol di entre otro violencia contra docente y protesta ...