E ‘Marine Autonomous Recording Unit’ di graba zonido di bayena a wordo recogi y awor ta bay wordo manda bek pa analisis.
E projecto aki ta inclui islanan Bonaire, Republica Dominicana, Guadeloupe, Martinique, St. Maarten y Aruba. Na Aruba e colaboracion a bay hunto cu Aruba Marine Mammal Foundation (AMMF) representa pa Angiolina Henriquez y tambe cu diferente instancia local. E aparato cu a wordo uza ta forma parti di e projecto “Caribbean Humpback Acoustic Monitoring Program (CHAMP)” y a wordo financia pa National Oceanic and Atmospheric Administration (NOAA) cu aporte parcial na Aruba.
Tin indicacion anecdotal cu tin Humpbacks cu ta keda un tempo hopi mas largo den Caribe cu tawata conoci y cu por tin Humpbacks cu ta migra for di Atlantico Sur tambe te na Caribe na caminda pa Brazil. Ta necesario pa colecta e datonan aki pa asina por defini e temporadanan real anual cu e region di Caribe ta sirbi como refugio di sobrevivencia pa e especie protegi aki, y asina aporta na proteccion di e region di lama Caribense.
E aparato aki a wordo desaroya pa y ta propiedad di Cornel University. NOAA a huur esaki ya cu e ta graba frecuencia di zonido di bayena Humpback y Bryde’s cu ta frecuenta Aruba su awanan. E bayena masculino Humpback ta produci un canto compleho di duracion di 10-20 minuut, cu nan ta keda repiti pa oranan largo. Humpback whales ta migra anualmente pa come den awanan hopi friu cerca di Arctica, p.e. Noorwegen y Alaska, y pa awa di temperatura mas halto pa haya yiu, p.e. na Silverbanks , Republica Dominicana. E grabacionnan di e proyecto aki ta wordo uza pa por sa e diferencianan den e cantonan aki y diferencianan den periodo di yegada di bayena den e region.
