Gobierno a pidi e compania Johnson’s Enterprises pa haci testnan di kima sushi riba tereno di e refineria na San Nicolas.

Manera conoci gobierno ta buscando un solucion activo for di november aña pasa pa e situacion na dump Parkietenbos. Prome minister a priminti di cera e dump na januari sinembargo no a logra. E idea e tempo ey tabata pa Ecotech tuma over e recogemento di sushi y wak si por kim’e parcialmente na Aruba den e planta di Ecogas y den un burner nobo cu Serlimar mester maneha. E resto lo purba di busca compania di afo pa recicla/procesa. Tambe kier a cuminsa un proyecto di sanea e dump di Parkietenbos.

Despues di lunanan sin solucion, minister di Medio Ambiente Mike de Meza a declara e luna aki cu lo cera e dump dentro di un par di siman. E comision di gobierno special pa e situacion di dump ta buscando soluciona mas activo desde un otro candela grandi cu explosion na dump di Parkietenbos siman pasa. Trahadonan di Serlimar a bay den accion e siman ki atrobe pasobra nan tin miedo pa nan trabou. Gobierno a reacciona cu nan lo garantisa nan trabou. Pero kico ta kico cu e dump awor, ainda no ta mucho cla.

Politico Booshi Wever di UPP ta informando desde siman pasa cu gobierno a duna e compania Johnson’s e trabou hunto cu Ecotech/Eco Gas pa kima sushi pa asina por cera e dump. Bon Dia Aruba tabata busca confirmacion y awor nos tin informacion cu gobierno berdad a puntra e compania aki pa haci un test di kima sushi. Ta trata di kima ‘Envirobale’, (manera por a mira na Balashi unda Ecotech/Eco Gas a traha un dump di e paketenan berde di sushi aki) pakete di sushi cu prome e intencion tabata pa kima den un burner na Parkietenbos mes. Pa asina determina entre otro con ta para cu e huma cu ta sali. Pero pa motibo cu e burner nan na Parkietenbos no ta suficiente grandi a dicidi di haci e testnan aki riba tereno di refineria unda e compania tin un burner mas grandi.

Manera Bon Dia Aruba a yega di skirbi den articulonan over di e contract cu Citgo y traspaso di tereno pa Pais Aruba aña pasa, gobierno tin intencion pa asigna 3 area riba tereno di refineria cu lo fungi como dump. Un ya ta den funcion, esey ta e dump ilegal di asbest na e tereno banda di Fort Heuvelstraat na Lago Heights. E otronan lo bin acerca, esta uno destina pa Citgo por uza pa dump su sushi, y e otro manera Refineria di Aruba tambe a splica nos den un entrevista, ta pa sushi di cas organico.

Mester remarca cu segun informacion cu nos a ricibi, e Envirobale no ta contene sushi ‘organico’ so. Tambe ta contene plastic cu no por recicla. Kimamento di plastic ta conduci na huma dioxin cual ta hopi toxico.