Den cuadro di digitalisacion di SVb, e banco di seguro social ta haci un yamado na tur dunado di trabou riba e importancia di registra riba e plataforma digital nobo, ‘Mi SVb’.
Director di SVb, Edwin Jacobs a comenta cu esaki ta e plataforma di comunicacion den era digital cu nan ta hinca den e departamento un par di luna atras. Asina tambe comunidad a cuminsa acepta e cambio. Na e momentonan aki tin 2.474 dunado di trabou cu ya a registra riba e plataforma aki, cual ta representa 67% di e cantidad total di dunado di trabou na Aruba.
Asina mes, el a menciona cu e departamento ta haci un campaña pa stimula e dunado di trabou pa pasa over pa cu ‘Mi SVb’. Nan ta mandando carta pa tur dunado di trabou cu no a registra ainda, den cual ta duna nan un opcion di un forma facil pa registra y despues ta haci un yamada pa sigura cu a realisa e proceso en cuestion.
Jacobs tambe a manifesta cu nan a haya informacion cu ta existi hende cu no ta habri ni lesa e carta y esey ta hopi lamentabel, pa motibo cu ta un decision cu ta perhudica nan empresa y por conduci na problema den futuro.
Tambe Jacobs a duna di conoce cu a cuminsa cu cobransa digital. A traves di e web portal, e dunado di trabou tin tur informacion y por mira cuanto e ta paga pa cada trahado.
