Den e entrevista cu Bon Dia Aruba tabatin recientemente cu Edwin Jacobs, director di SVb, el a duna lagun detaye tambe di e situacion di expectativa di bida di nos pensionadonan. Segun Jacobs, edad promedio di pensionado na momento di fayecimento den ultimo 5 añanan ta keda, pa hende muhe, na e edad promedio di 80.5 aña, loke por mira tambe riba e graficonan acompañante.
Jacobs a señala cu esaki por ta un indicacion cu expectativa di bida di e personanan cu edad di pension bay ariba ta kedando basta stabiel, aunke den pasado a constata un aumento di e edad promedio general, pa muhe y homber, desde cu nan yega na edad di pension.
Di otro banda, el a conta cu loke nan ta mira cu preocupacion ta cu edad promedio na momento di fayecimento di pensionado hende homber a baha na 76.8 na aña 2018, y na 2019 a yega te 76.6. Desde 2015 e edad promedio di hende homber unda nan ta fayece a baha di 77.1 aña, un retroceso di edad promedio, un tendencia cu no ta mira cerca hende muhe. Esaki por ta un indicacion cu expectativa di bida di hende homber lo ta bahando.
Ademas, el a bisa cu nan ta wardando e cifranan di e Censo di e aña aki pa nan por traha e tabla di mortalidad pa pais Aruba y asina nan por indica si expectativa di bida, en general o pa homber y muhe separa, ta subi of baha.
