Lider di fraccion di AVP, Marlon Sneek a manda un carta na Presidente di Parlamento ya cu nan kier haya mas claridad riba asunto di frontera cu Venezuela. Ya cu di un banda nan por a lesa cu frontera ta habri diamars awor, y di otro caminda Prome Minister di Aruba ta bisa cu e frontera ta cera.

E echo cu a permiti pa cierto compania aereo cuminsa opera pa Venezuela, mientras cu di otro banda gobierno ta anuncia cu ainda e frontera cu e pais bisiña ta cera, ta algo cu fraccion di AVP a yega di cuestiona, ya cu tampoco no tin claridad.

Sneek a indica cu patrocinado politico di cierto partido di e coalicion di gobierno y inversionista den un compania aereo ta anuncia cu nan por bula cu jet priva pa Venezuela. Mientras cu di otro banda, Prome Minister encarga cu relacion exterior, Evelyn Wever-Croes ta bisa cu frontera ta cera. P’esey e fraccion aki ta pidi claridad. “Nos kier sa si ta privilegia hendenan atrobe,” Parlamentario Sneek a bisa.

E ta haya cu mientras cu e frontera ta keda habri specificamente pa un compania aereo, pa otronan como e importadonan di fruta y berdura ta cera. E comerciantenan aki cu ta abastece nos mercado cu fruta y berdura na un prijs mas barata pa e consumidonan local, nan no ta conta, segun Parlamentario Sneek.

“Dicon e ta conta pa esunnan cu ta sponsor e partido si, anto pa e resto di pueblo, nada no ta conta,” el a bisa. E ta haya cu e situacion aki ta inaceptabel.

Parlamentario Sneek a bisa asina leu cu nan sa, un frontera Reino tin. Mientras cu nan no sa e tipo di excepcion cu ta tumando luga rond di e apertura of no di e frontera cu Venezuela. Nan kier haya claridad riba esaki pa tur hende sa kico tin berdad. Kier men si e frontera berdad ta bay habri. Y si ta asina, pa kico ta habri pa un grupo specifico. Tambe kico a para cu e islanan ruman den Reino cu tambe ta confronta e mesun situacion cu berdura, ni frutanan no por yega pa nan comunidad. Mientras cu aki na Aruba ta wordo haci excepcion pa un cierto comerciante cu a sponsor un partido politico di e coalicion di gobierno, segun e lider di fraccion di AVP.

Den su edicion di ayera, Bon Dia Aruba a publica riba pagina A4 e declaracion cu Minister Presidente, Wever-Croes a duna riba e situacion di e frontera cu Venezuela. El a anuncia cu e frontera cu e pais bisiña ta keda cera. Pero si por haci uzo di Aruba pa vuelo di transito. El a duna comentario riba e situacion cu Aruba Airlines y aeropuerto chikito. Segun e mandatario ‘no por keda haci excepcion pa frontera cera cu Venezuela.’ Sinembargo e ta consciente cu no por tene e frontera aki eternamente cera y nan ta trahando riba e modelo ESTA, manera ta existi na Merca.

Sinembargo gobierno a yega di ricibi un carta unda e compania aereo Aruba Airlines y aeropuerto chikito a splica cu e ceramento di e frontera a causa un impacto grandi riba nan negoshi. Aruba Airlines ta un compania cu ta duna trabou na 200 persona, mayoria di nan hendenan local. Nan a pidi un vuelo di transito, caminda persona di Venezuela por bay Merca via Aruba. “E peticion a wordo haci y nos tin’e den consideracion”, e prome mandatario a bisa. E ta haya cu si no wordo haci asina, e compania no lo sobrevivi.

Premier Wever-Croes a remarca cu por haci uzo di Aruba pa transito, pero na Aruba ningun hende por keda si ta bin di Venezuela. Nan tin cu keda den avion pa bay stret Merca.

 

 

 

LEAVE A REPLY

Please enter your comment!
Please enter your name here