Apple a defende su hefe di seguridad despues cu el a ser acusa di soborno, pa supuestamente ofrece di haci un donacion di centenares di iPad na e Oficina di Sheriff di condado di Santa Clara a cambio di permiso pa porta arma pa empleadonan di Apple.

Thomas Moyer, hefe di seguridad global di Apple, a ser procesa siman pasa como parti di un investigacion di dos aña riba e oficina di sheriff, segun oficina di fiscal di Santa Clara. Moyer supuestamente a bay di acuerdo pa haci donacion di 200 iPad na balor di $70mil na oficina di e sheriff a cambio di cuatro permiso cu tabata rechasa pa empleadonan di Apple, oficina di fiscal a bisa den un declaracion. Apple tin su sede na condado di Santa Clara, den curason di Silicon Valley.

Abogado di Moyer, Ed Swanson a bisa cu Moyer tabata ‘collateral damage’ den un disputa publico entre departamento di sheriff y oficina di fiscal. Undersheriff di Santa Clara, Rick Sung y capitan James Jensen, kende supuestamente a solicita e soborno, tambe a keda procesa.

Apple tambe a defende Moyer, bisando cu e compania a ‘conduci un investigacion interno profundo y no a encontra ningun fout’.

Seguridad a bira un asunto clave na companianan tecnologico den añanan recien mientras nan a atrae mas atencion di publico, hunto cu menasa di violencia. Na 2018, un homber arma a tira riba empleadonan na sede di YouTube na San Bruno, heridando tres trahado prome cu segun reporte el a comete suicidio.

E aña aki, Apple a ricibi un orden di restriccion contra un homber na San Francisco kende supuestamente a presenta na cas di Tim Cook cu un boter di champagne y flor, y den otro ocasion a drenta propiedad di CEO di Apple sin permiso y a haci declaracionnan menasante.

Oficina di fiscal a bisa cu den caso di Moyer, e deal di iPad-pa-permiso di arma a keda destrui na augustus 2018 tempo cu oficialnan den departamento di sheriff cu tabata involucra den e schema a haya sa di investigacion di fiscal riba e licencianan di porta arma di e departamento.

LEAVE A REPLY

Please enter your comment!
Please enter your name here