Finalmente Apple ta enfrentando Netflix cu su propio servicio di streaming television, y den un movida poco caracteristico pa e compania, ofreciendo esaki na un prijs economico di $5 cuminsando dia 1 di november.
Walt Disney Co. ta lansando su propio reto contra Netflix e mesun luna, pa $7.
Apple a duna e noticia diamars mientras tambe a revela tres iPhone nobo cu no ta mucho diferente na e modelonan di aña pasa.
E prijs agresivo ta inusual pa Apple, cu tipicamente ta cobra premium pa producto y servicionan pa su brand. E servicio lo yama Apple TV Plus.
Pero Apple ta drentando un servicio cu Netflix practicamente a inventa na 2007 – rond e mesun tempo cu e prome iPhone a sali. Y Netflix a amasa mas di 150 miyon suscriptor, cual ta nifica cu Apple mester a logra crea un impresion.
CEO di Apple, Tim Cook no tabatin mucho di bisa tocante e servicio di TV mas leu cu su prijs y fecha di debut, maske a mustra un trailer pa un serie nobo cu Jason Momoa titula ‘See’.
Netflix a nenga di comenta.
Manera Neflix y servicionan similar di Amazon y Hulu, Apple ta gastando biyonnan di dollar pa programanan original. Esun mas anticipa te awo ta ‘The Morning Show’, un comedia cu Jennifer Aniston, Reese Witherspoon y Steve Carrell. E servicio lo lansa cu nuebe serie y show original, cu mas spera cada luna. Lo tin unicamente contenido original di Apple, y lo ta disponibel na 100 pais na momento di su lansamento.
