Siman pasa diahuebs e Copa Don Elias Mansur 2019 a inicia den stadion Guillermo Prospero Trinidad na Dakota. Prome cu e partido entre RCA y Nacional a inicia cu un ceremonia di apertura unda a duna homenahe na nos baluarte den futbol, Edwin Dirksz como tambe Famia Mansur cu pa 21 aña ta patrocina e CDEM. Presidente di RCA, Sr. Ditto Acosta a hiba palabra unda el a repasa e trayectoria impresionante di e miembro di honor di R.C.A. Sr. Edwin Dirksz cu sigur tabata e mas grandi cu Aruba a yega di conoce como futbolista, pero tambe como entrenador di futbol.

Edwin tambe a practica deporte di Judo y tawata un gran cabayista. Na mesun momento RCA como e organisado di e Copa Don Elias Mansur a reconoce e balor di famia Mansur cu pa decadanan ta patrocina R.C.A. y pa 21 aña a kere den e torneo di futbol cu semper a fungi como un pre-campeonato.

Presidente ASU, Sr. Gerald Franca a gradici Serge Mansur pa su gran aporte, pero tambe a elogia q.e.p.d. Sr. Don Elias Mansur mirando cu e tawata un persona cu a coopera masha hopi cu deporte en general na Aruba.

E prome saca di bala a wordo efectua pa bisanieto di Edwin Dirksz, Ki-Jean Ras y hunto cu Serge Mansur. Presente tambe tawata hungadonan di INRO cu ta compañeronan di Edwin Dirksz.

E mesun anochi tawatin dos partido di Poule A, unda R.C.A. ta vence Nacional 4 pa 1 y Urataka Center Man of the Match tawata Ronald Gomez. Caravel ta empata cu Dakota 2-2 y na penalties Caravel ta gana 4-3, aki UC Man of the Match a resulta Kenrick Dania.

Diabierna anochi a continua cu Poule B, La Fama ta cay venci 3-0 contra di Britannia. U.C. Man of the Match tawata Owen van der Wijde y Brasil jrs ta perde 2-0 cu Bubali unda Antonio Lopez tawata Man of the Match.

Diasabra anochi tur wega ta cancela pa motibo di e situacion cu coriente. Diadomingo ta bira e dia grandi cu mas di 300 hende den stadion. La Fama y Brasil jrs. ta empata 2-2 y na penalties La Fama ta gana 4-1. U.C. Man of the Match a bira e Keeper di La Fama Gilbert Bautista. Britannia ta bolbe vence den gran forma, e biaha aki contra Bubali 2-0. U.C. Man of the Match a resulta Francis van der Linden di Britannia kende tambe a haya un infraccion lamentabel. Organisacion tricolor ta desea Francis pronto recuperacion.

Dialuna anochi tawata e Gran Clasico di Aruba unda R.C.A. ta gana Dakota 2-0 cu dos gol Ronald Gomez kende ta bolbe sali Urataka Center Man of the Match.

Diamars anochi den un wega masha interesante Nacional ta gana Caravel 2-1 y Man of the Match ta bira Deibis Olivares, kende a score un gol y duna un asistencia.

Fin di siman venidero lo ta grandisimo, diahuebs anochi pa 7or RCA vs Caravel, sigui pa Dakota vs Nacional. Den e poule aki niun team ta elimina y niun team a clasifica ainda pa semi-final. Diabierna tambe lo tin wega unda pa 7or La Fama lo topa Bubali y e ganado lo clasifica. Pa 9or Brasil jrs cu ta elimina vs Britannia cu ya caba a clasifica. Diasabra anochi lo continua cu e 2 weganan di semi-final. Diadomingo e programa ta extenso cuminsando 5:30 cu Inter vs Roma den 45plus. Pa 6:30 dames RCA vs Seleccion di Aruba. Pa 8or di anochi e gran final Copa Don Elias Mansur 2019.

 

LEAVE A REPLY

Please enter your comment!
Please enter your name here