Home Local Archivo Nacional Aruba a ricibi miniatura di ‘Torpedo’ di Segundo Guera Mundial,...

Archivo Nacional Aruba a ricibi miniatura di ‘Torpedo’ di Segundo Guera Mundial, cu a subi tera na Eagle Beach

139

Den fin di siman cu a pasa,  hefe di Archivo Nacional Aruba, Raymond R. Hernandez a haya bishita di George Davelaar di Corsou y Dufi Kock di Aruba. Archivo Nacional a ricibi miniatura di ‘Torpedo’ di Segundo Guera Mundial, cu a subi tera na Eagle Beach na e encuentro aki.

Segun e informe di Archivo Nacional, sr. Davelaar ta un aficionado di plak ‘modelbouw’ specialisa den e ramo di diorama. Diorama ta un mundo di miniatura caminda obhetonan ta wordo poni di tal forma cu e ta crea e impresion di ta real.

Na 2016, sr. Davelaar a traha un diorama di e torpedo cu a subi tera na Eagle Beach. Esaki tabata dia 16 di februari, 1942. Su deseo semper tabata pa entrega Aruba e diorama aki y esaki a bira realidad na momento cu el a cera conoci cu sr. Kock via di Facebook.

Mirando e balor historico di e diorama aki pa su isla, sin pensa dos biaha, sr. Kock a bisa sr. Davelaar cu e diorama tin cu bay na un luga caminda e pueblo di Aruba por admira e obra di arte unico aki, traha pa e maestro sr. Davelaar.

Den cooperacion cu Archivo Nacional Aruba, e entrega a tuma luga diabierna, dia 3 di augustus ultimo. Na e ocasion aki sr. Davelaar a realisa su soño di entrega e diorama di e torpedo cu a subi tera na Eagle Beach.

Na 2006, sr. Davelaar a participa na competencia den e ramo di diorama riba tereno internacional na Europa. A pesar cu e diorama aki no a logra di gana medaya, e a impresiona e huesnan y creadornan di diorama enormemente pa e arte, e suceso peligroso, pero mas pa e aporte impagabel cu Aruba a duna na aliadonan y mundo henter durante Segundo Guera Mundial.

Den su carera el a participa na 7 competencia internacional di diorama (entre otro na Hungria y Belgica), cu e diorama titula ‘Brotherhood Parade WW1-1918’. Na 2017 y 2018 e a logra di gana tres medaya. Dos medaya di oro, un na Hulanda, e otro na Checoslovakia y un medaya di plata na Alemania.