editorial

Na luga di concentra riba gobernacion drechi…

Cu un proximo conflicto cu Hulanda na caminda, e lamentonan cu keto bay  no tin un areglo di conflicto den Reino y cu gobierno Hulandes ta ‘dragging its feet’ den e asunto, no ta nada straño. Pa purba trece paz momentaneo, ministro di Asunto di Reino Plasterk a propone un solucion temporal pa dos aña, cu un proceso via Raad van State. Den e situacion y ambiente di guera den Reino actualmente, ta casi sigur cu su proposicion lo keda rechasa pa e tres gobiernonan di Aruba, Curaçao y St. Maarten. Y esey no solamente pasobra nan no ta di acuerdo, y lo ta desea cu e caso ta bay pa Corte Superior pa un veredicto inalterable na luga di un conseho, pero tambe pasobra tanten cu e asunto no keda soluciona, e ta e miho ‘trinchera di guera’ cu e gobiernonan tin pa kita atencion di e situacion interno di nan pais.

Y e casonan cada un ta diferencia di otro, pero tur ta di un gravedad suficiente pa gobierno di Reino ta preocupa berdaderamente. Por lo tanto no ta posibel pa mira nan preocupacion como algo no desea den asunto interno. Esunnan cu a sigui e acontecimento nan na Curaçao durante ultimo añanan, por a mira con a tuma luga un intento macabro pa podera di informacion confidencial di Servicio di Inteligencia (VDC), cu hasta a bay hopi mas leu cu e intento na Aruba na aña 1994 durante gobernacion di AVP/OLA, cu a hiba na e deseo di gobierno di Reino di destitui e ministro di Husticia (via un KB) di e tempo ey.

Realmente awor aki, Reino a faya den su tarea di supervision y laat den e proceso a cuminsa actua contra gobierno di Curaçao. Esaki probablemente a causa daño grandi na e servicionan cu tabata colabora cu nan coleganan di Curaçao, entre nan esun di Hulanda mes. Na Curaçao problemanan di caracter financiero tambe a hunga un papel, tabatin un ‘aanwijzing’ contra gobierno di Curaçao, pero na e momento aki esey no ta e tema principal. Den e caso di St. Maarten ningun hende ta keda straña cu regularmente tin problema di integridad cu ta exigi atencion di e nivel superior di Reino, pasobra e isla tin un reputacion di corupcion historico, cual ta resulta dificil pa kita for di caminda.

E caso di Aruba ta di otro indole, cu mas cu tur cos ta trata di mal maneho financiero di gobernacion den su totalidad, aunke lo bale la pena haci investigacion mas acerca di cierto proyectonan, manera esun di hospital unda e miho oferta di e compania Frances Bouygues a keda rechasa pa faborece un oferta menos faborabel di e compania cu a gana e proyecto.  Tambe e caso di tiramento na Parlamento a hala atencion, principalmente pasobra autoridadnan hudicial no ta parce di tin mucho gana di move cu mas diligencia.

E problema financiero a ser trata den tur su aspectonan, tambe den e seccion aki, pero ta keda un problema di largo plaso. Pa sigur e proximo dies pa diescinco aña e ta keda ‘on top of the list’ pa cualkier gabinete cu bay sinta. Gobierno actual tambe ta consciente di esey y ta dedica bon atencion na tur instrumento o arma cu nan por uza den e guera prolonga cu nan ta hiba contra gobierno di Reino, sigur ora e partidonan den gobierno Hulandes no tin ningun relacion di ideologia o amistad cu partido AVP. Den esaki anto ta di compronde cu nan ta concentra riba e ‘arma’ di e areglo di conflicto. Pakico tanto atencion pa esaki, mientras cu den pasado nunca esaki a haya tanto atencion? Tin dos tendencia importante den esaki. Uno ta cu desde institucion di Statuut na 1954 e mundo na nos alrededor a cambia bastante. Reino Hulandes a bira un parti mas integra di Union Europeo, loke tabatin consecuencia cu na Den Haag mester a siña biba y opera den un constelacion cu ta defini hopi cos di ariba pa gobierno Hulandes. Tambe tabatin un desaroyo grandi den tratado internacional riba hopi diferente tereno, cu tin consecuencia pa Reino, y den hopi caso pa e islanan tambe. Es decir, mester tin awendia un comunicacion hopi mas intensivo entre Reino y e islanan riba un cantidad di asunto, y simplemente marca esaki como ‘intromision den asunto interno’ ta incorecto y contra productivo.

E politiconan local den poder actualmente, no kier reconoce cu nos ta parti di algo mas grandi cu nos mes, a menos cu nos opta pa bira independiente. Pero nan sa cu nan no por yega cerca pueblo di Aruba cu e storia ey. Mientras tanto, nan ta uza tur arma cu tin y e grito pa un areglo di conflicto ta un di nan. E alternativa ta pa simplemente goberna drechi, y discuti y yega na solucion cu gobierno di Reino, cu tin e derecho y deber pa vigila gobernacion riba su ciudadanonan na Aruba. Pakico prome cu 2009 si esey tabata e manera di regla asunto? Nos a lubida esey?

LEAVE A REPLY

Please enter your comment!
Please enter your name here