Dia 17 di augustus, na momento cu su pais tabata cada biaha mas hundi den un crisis economico, presidente Mauricio Macri a reconoce na un conferencia di prensa cu mas Argentino tabata biba den pobresa.
E tasanan di interes a alcansa e nivel maximo mundial, e inflacion lo bay cera aña na 50% y e peso a keda devalua cu casi 50% compara cu dollar, loke a haci e poder di compra di e Argentinonan evaporea.
E clase medio tabata custumbra cu biba cu inflacion halto y cu crisis cu ta ripiti cu frecuencia pa un deficit publico recurente, y debi na escasez di industrialisacion, cu ta haci e pais sumamente dependiente di su exportacion agropecuario.
Tempo cu el a asumi e puesto, Macri a cumpli cu su promesa di elimina e control riba capital, reduci e impuesto riba exportacion y laga e peso flota, loke a agrada e inversionista stranhero.
Tambe el a priminti reduci e inflacion halto y limit’e na un digito so, pero esey no a sucede.
E economistanan ta pronostica cu e pais lo bay termina aña 2018 cu un inflacion di casi 50%.
Pa via di e crisis, Macri a keda hopi visibel na television nacional, den un intento pa splica e Argentinonan e pasonan cu su gobierno ta tuma. Sin embargo, su indice di aprobacion a cay drasticamente segun cu e e Argentinonan tabata experimenta mas problema financiero.
Asina e empleadonan di estado a sinti e ahustacion di economia, y companianan priva cu tin nan produccion o servicionan destina pa e mercado domestico, ta pasando den momentonan critico momento pa e caida di consumo interno. Loke tabata clase medio a keda reduci den ambos sector.
