Dia 9 di juli ultimo, Argentinonan a celebra 204 di su independencia, pero hopi di nan ta parce cu no ta sinti nan mes liber den tempo di pandemia.

Cu e protesta denomina ‘banderaso’, centenares di persona cu caravana of na pia a manifesta contra e paralisacion comercial y un cuarentena extenso cu a cuminsa 20 di maart.

Cu mondkapje, pero sin respeta e aislamento social , e dia liber tabata escenario pa ratifica e reclamonan di un crisis economico di añanan, cu a wordo profundisa pa e restriccionnan di e ultimo lunanan.

“E tipo aki (Alberto Fernandez) no tin ningun plan economico, e kier pa nos ta pober… esey ta afecta mi, mi no tin ningun tipo di entrada desde haci cuatro luna, pero mi ta sigui paga mi impuestonan”, Magdalena Fariña, un muhe cu tabata traha como organisado di eventonan social a sigura.

Otronan a señala, cu incluso e pandemia ta un fraude, pa motibo cu “hopi hende ta muri di grip y neumonia”, cu di Covid-19, Lilian Cubrero a bisa, un medico cu a Sali pa protesta y a agrega cu “ningun di e Podernan di Estado no ta funciona y mientras nan ta haci nos cualkier cos”, el a afirma.

E ‘banderaso’ a wordo organisa pa gruponan opositor di Gobierno di Fernandez, convoca na diferente ciudadnan a traves di rednan social. Na Buenos Aires, e capital, e manifestacionnan a reuni specialmente dilanti e Obelisco y Cas Ros, na unda nan a pidi ‘husticia y libertad’.

E protestanan aki a produci oranan despues cu e mandatario a manda un mensahe pacifico pa e Argentinonan, a traves di un video conferencia, pa celebra e historico dia. Fernandez a recorda cu ta dianan dificil no pa Argentina so, sino pa hopi nacion pa via di e pandemia, pa loke a pidi pa laga tras e divisionnan y “pa uni pa un destino comun”, supera e crisis.

 

LEAVE A REPLY

Please enter your comment!
Please enter your name here