Luna pasa, Fundacion Bon Gobernacion Aruba a manda un carta na minister di Integridad, Ursell Arends, titula “Disculpa pa e consecuencianan di decadanan di gobernacion y discusion publico riba nos sistema politico.” Den e carta, e fundacion ta propone pa minister di Integridad, den nomber di gobierno historicamente como institucion, pidi disculpa na pueblo di Aruba.
“E hecho cu ya caba na comienso di Status Aparte gobierno di e tempo ey a kita e control (financiero) interno, esey caba pa mi ta un muestra cu bo no tin ningun intencion pa tin control debido di bo actonan,” Hessels a comenta. “Anto esey a keda, semper. Tur esey, incluyendo patronahe politico, nombramento di personal… bo ta wak cu nan ‘no ta give a damn’ tocante bon gobernacion.”
Hessels den su carta ta detaya con mal gobernacion no solamente ta kibra confiansa di pueblo den nos institucionnan, sino tambe ta costa placa. “E ta costa nos miyones.”
Mal gobernacion tin varios aspecto, entre nan, corupcion, mal maneho financiero y nombramento politico. Y mientras cu corupcion ta costa miyones di florin, mal maneho financiero y nombramento politico ta costa centenares di miyon pa pueblo di Aruba paga. Y esaki ta sistematico, aña tras aña. “Eynan mi problema ta bay. Desde comienso di Status Aparte, e cuestion di nombramento politico, e cuestion di mal administracion financiero intencionalmente, e cuestion di maneho di proyecto cu a bay malo, cu a costa nos cantidad di centenares di miyon. “E autonomia cu nan ta gaña di defende ta simplemente nan autonomia pa evita cu e partner mas fuerte den nos Reino, cu ta Hulanda, por taha nan di kico nan ta haciendo. E autonomia no ta na fabor di pueblo di Aruba mes.” Hessels ta indica cu tin hasta encuesta cu ta indica cu pueblo di Aruba mes no ta confia riba nos politiconan y si ta prefera pa Hulanda tin control riba finanzas. Algo cu nos politiconan ta prefera di tapa. “Esnan cu a afecta nos autonomia no ta Hulanda, sino nos propio politiconan cu a hiba un maneho financiero totalmente deficiente, iresponsable, y tur esey a haci cu nos como pueblo tin un debe gigantesco cu ta practicamente impagable.”
Aruba na e momento aki ta paga 300 miyon florin pa aña simplemente na interes. “Anto e 300 miyon florin aki ta mas placa cu loke henter nos presupuesto di Enseñansa ta costa,” Hessels ta agrega.
Den su carta, Fundacion Bon Gobernacion Aruba ta destaca con ademas di tur caso cu tin den corte relaciona cu corupcion y mal maneho (Ibis, Avestruz, Flamingo, Diamante, Kukwisa, Kwihi y e investigacion riba ex-minister Besaril), varios investigacion y demanda a tuma lugar manera den Landslaboratorium, unda a haya cu a malversa dies miyon florin; Directie Onderwijszaken unda empleadonan a malversa fondo di beca na balor di un miyon florin, placa cu a desaparece na Enseñansa pa Empleo, y e Anglozaak – miho conoci como Vacunagate. Y esaki no ta tur pasobra segun e carta ta indica, “CAD ta descubri mal maneho den practicamente tur investigacion cu ta haci riba departamentonan di gobierno dentro di e posibilidadnan hopi limita cu tin.
Pero ademas di corupcion, e otro aspectonan di mal gobernacion – patronahe politico, arbitrahe cu evasion di ley; toma di decision no-transparente; fayo di cumpli cu acuerdo y compromiso; falta di transparencia; mal maneho financiero y di personal; obstruccion di control y responsabilisacion; uso ilegal di poder; politica coruptivo y falta di integridad – tabatin un impacto hopi mas dañino riba Aruba. Mal gobernacion ta haci cu gobierno di Aruba nunca tin placa. Aruba a keda cu un gobierno cu consumo halto, cu a conduci na un debe nacional practicamente impagable di seis biyon florin excluyendo obligacionnan di PPP di casi un biyon florin. Pa motibo di e debe aki cu interes halto, pa decadas a haci relativamente tiki inversionnan sostenible a largo plaso pa amplia e base economico di Aruba. Ta tuma tiki medida pa reduci gasto pa contraresta e aumento casi anual den gasto, sino cu ta keda busca fuente nobo di entrada (esta, impuesto) pa mantene e aparato di gobierno den e forma aki. E aumento regular di impuesto ta keda kibra e poder di compra di e poblacion.
Disculpa
Mirando e daño cu e mal gobernacion structural y continuo durante decadas a haci na Aruba, e fundacion ta propone un disculpa publico di gobierno. E idea a bin mirando cu prome minister Hulandes, Mark Rutte, den nomber di gobierno Hulandes como institucion historico, a pidi disculpa pa e pasado di sclavitud den Reino.
“No ta coincidencia cu e puntonan principal di Gabinete Wever-Croes I tabata Bon Gobernacion, Transparencia y Integridad,” segun e carta. E gobierno nobo na 2017 aparentemente tabata na altura cu e conceptonan aki a ser viola pa administracionnan anterior. Sinembargo, esaki no ta nifica cu no tabatin mas violacion riba e principionan aki. Al contrario, e prome Gabinete Wever-Croes a cay pa motibo di posible corupcion di partnernan di coalicion (resultando den casonan Flamingo y Diamante), mientras hasta nan propio miembronan di partido a resulta di no tabata honesto, resultando den retiro di minister plenipotenciario y dos ex-minister den caso Kwihi.”
Esaki ta e motibonan cu ta confirma e sentimento entre nos pueblo cu corupcion entre gobierno, incluyendo administracion, ta comun, manera ta indica den encuesta di percepcion di corupcion di CBA. Pa e motibo aki, “ta di gran importancia pa gobierno publicamente reconoce cu e calidad di gobernacion despues di Status Aparte a faya severamente, cu consecuencianan serio y duradero (financiero y otro) pa poblacion di Aruba. E reconocemento aki cu speransa por conduci na esfuersonan conhunto (a traves di participacion ciudadano) pa mehora e calidad di gobernacion y impulsa desaroyo positivo di nos pais,” e carta ta indica.
“Di otro banda, e falta di reconocemento y disculpa lo laga na cla cu “e politiconan” no tin intencion di cambia nan manera pa finalmente pone e interes di e poblacion na prome lugar.”
“Tanten cu no tin e reconocemento publico cu abo como gobierno – y mi no kiermen e gobierno aki, aunke mi ta kere si cu ainda tin cosnan indebido ta pasando – no reconoce loke a tuma lugar structuralmente, e ora nos como comunidad no por confia cu nan lo bay mehora, coregi nan eror, nan forma inaceptable di goberna e pais aki,” Hessels ta comenta. “Tanten cu no tin e disculpa ey, nos no por confia cu lo tin mehoracion.”
Si gobierno no reconoce e fout, nos por kere cu nan ta haya cu ta masha bon. Y ta p’esey un disculpa oficial tin cu bira e prome stap pa mehora gobernacion na Aruba.
Alabes ta di sumo importancia pa pueblo realisa e daño cu mal gobernacion a causa na cada un ciudadano, pasobra no tin infrastructura ni servicio adecuado, placa di ciudadano ta ser mal administra di un manera cu no ta beneficia e ciudadano y despues no tin placa pa cuido di salud, enseñansa y seguridad di e ciudadano. Ciudadanonan mester realisa con mal gobernacion ta afectando e interesnan personal di cada un y cu ta den nos propio interes pa exigi pa drecha gobernacion.
