Diaranson mainta a continua e reunion den parlamento y esaki no a cuminsa den bon forma. Un biaha mas a presencia violacion di regla den parlamento cu ta kita e seriedad y credibilidad di parlamento, ta locual mr. drs Arthur Dowers a declara durante entrevista cu prensa.
Presidente di parlamento awe mainta e informa di cu e lo bay tuma un decision contra di e “reglement van orde” pasobra e ta sirbi transparencia, cual segun Dowers ta nonsense, mirando cu no por desvia di e reglement van orde y un decision asina ey no por bay sin aprobacion di e 21 miembronan di parlamento y/of di tur cu ta presente; y si acaso un di e miembronan no ta di acuerdo esaki no por tuma luga.
Reglamento ta uno hopi importante, sino bo ta bay haya cu un presidente di parlamento, segun su signatura politico/ gana politico por yega haci y deshaci contra di otro hende den e sistema politico y ta locual ta evita.
A tuma nota cu colega Minister, den e caso aki Andin Bikker a drenta reunion y cuestiona su propio colega Minister riba locual el a expresa durante reunion anterior y cu no ta algo normal, mas bien ta algo cu bo ta haci den ministerraad y no den parlamento den su reunion pa cuestion’e.
Parlamentario Athur Dowers tambe ta lamenta e manera cu e Presidente di Parlamento a actua awe mainta, caminda ta yega pa un reunion stipula pa cuminsa 9:00AM y miembronan di partido POR ta cana kibra 10:15AM dunando impresion cu no ta ni interesa mas den e reunion, of a ripara cu nan no por baha minister Lopez Tromp for di su puesto y a dobla warda. Na mes momento ta observa partido MEP no tin confiansa den Minister Marisol, cuestionando tur documento y pidi pa mira tur documento di nobo prome cu e papia mes y ta algo cu nunca a tuma luga cu ningun otro miembro di e Gabinete aki.
Ta sinti tambe cu no tin confiansa den locual el a presenta den e reunion anterior y ta cuestiona e informacion di corupcion tumando luga y kier pa Minister Lopez Tromp trece prueba di e corupcion tumando luga.
