Diaranson 2 di september 2020 e reunion publico yama pa parlamentarionan di POR a continua, cu tabatin como punto di agenda desconfiansa den nan propio Minister, den e caso aki sra. drs. Marisol Lopez Tromp.

E reunion aki a cuminsa dia 31 di juli 2020, pero a ser para den di dos tanda pa motibo cu parlamentarionan di POR a pidi na Presidente di Parlamento, pa pidi Minister President intermedia den un problema interno di partido POR. Y sigur den bista di locual e Minister a trece den prome tanda contra su mesun coleganan di partido POR a haci e relacion di trabao uno mas dificil, principalmente e acusacionnan contra Minister Andin Bikker y parlamentario Howell.

Intermediacion cu Minister President

Nos por a tuma nota for di un carta cu Minister President a dirigi pa parlamento cu e impasse den POR a termina y cu nan ta dispuesto pa sigui traha cu otro y sigur tambe cu Ministerraad tambe den interes general ta dispuesto pa traha cu e Minister en cuestion. Y asina por a conclui cu e minister ta conta cu confiansa di su colega Minister Andin Bikker y alabes lider di POR y tambe e dos parlamentarionan di POR. Esaki ta nifica cu Minister Marisol Lopez Tromp ta keda un Minister pa partido POR y cu lo tin di traha hunto cu su coleganan, pero tambe duna cuenta na su partido POR.

Reunion publico di ayera

Na momento cu reunion a habri integrantenan di MEP a exigi e minister pa documentonan cu su persona a papia di nan den prome tanda y sigur si tabatin mas documento cu lo bay papia di nan den di dos tanda, pa e por entrega nan pa nos por a haya tempo pa lesa nan. Motibo di esaki ta cu e agendapunt di e reunion ta desconfiansa den Minister Marisol Lopez Tromp door di fraccion di POR, pero den di prome tanda Minister mes a accentua cu e reunion aki ta bay over di integridad y corupcion y den e cuadro ey a trece acusacionnan dilanti y cu pa nos tabata hopi importante pa trece claridad riba nan. Y sigur a purba crea e impresion den pueblo cu e gobierno aki ta uno cu ta corupto y sigur cu e carteranan di su partido POR y tambe su mesun colega Minister y ex colega Minister di POR ta den actonan coruptivo, pero lo mas straño pa mi na final, cu e Minister no kier bandona su partido y no kier sali di un gobernacion cu e ta categorisa como coruptivo y sigur despues di a expone su partido y forsanan ageno den partido por cu ta pone presion riba dje y fors’e di haci cosnan cu no ta corecto y ta pretende cu su partido ta un neishi di corupcion, pero na final di mediacion ta dicidi di keda manera Crazy Glue na e partido y sigur na e gobierno.

Documentonan

Nos a haya 30 documento pa studia. Di e 30 documentonan aki: 10 tabata cartanan interno (6 nos tin caba entre nan e oproeping pa reunion), 6 contrato di supuesto spiritonan pero cu conseho positivo di directornan y di e esaki na 4 a ser kibra a base di un clausula den e contrato unda tin un opzeggingsternmijn di 2 luna y e otro 2 a ser kibra di biaha cu tabata lugar di media cu no tabata parce na trabao y dificilmente pa papia di spirito si esakinan partido POR mes a emplea, 6 conseho riba edificio incluyendo di Wayaca, Huis van Bewaring Dakota y e Independisacion di DIP, y 3 tereno cu nomber di hende cu a ser duna y cu ainda nos a keda warda riba splicacion di e esakinan durante e reunion y locual a resalta ta cu tur tabatin advies positivo di e director y firma pa e ex minister, y por ultimo 5 prohibicion di trahadornan pa drenta oficina di DIP, pa motibo cu tin investigacion interno pa sospecho di no a sigui procedura prescribi pa locual ta dunamento tereno comercial y tur esakinan ta relata na caso Flamingo. Pues ora wak bon practicamente e documentonan aki no tabata refleha locual Minister a trece di spirito y corrupcion na granel den di prome tanda y sigur mayoria documento ta refleho di investigacionan bieu manera caso di Flamingo y Avestruz.

Conclusion di e reunion

E esencia no tabata t’ey pa e reunion debi na reconciliacion di partido POR. Pa locual ta investigacionnan y iregularidadnan no tabatin casonan nobo pero casonan relata na casonan conoci caba pa pueblo cu ta Flamingo y Avestruz, sancionnan tuma den ambos caso di no permiti trahadornan drenta oficina pa sigui investigacionnan interno. Terenonan bao investigacion di Colony cu ta relata di un mocion cu nos mes a pasa na 2018 y sigur a resalta e tantisimo investigacion interno bao di Ministerionan di e Minister di Infrastructura y Medio Ambiente Marisol Lopez -Tromp riba posibel envolvimento di ambtenaarnan cu lo ta bao investigacion den casonan di kiebro di integridad y tambe corupcion. Locual a keda den aire y sigur despues cu minister Andin Bikker a bin dilanti ta e dos casonan di Wayaca y di e Huis van Bewaring unda Minister Andin a splica e procedura encamina y cu nada a bay robes y te ora sera e reunion, nos a keda en espera di contestacion di Minister Marisol Lopez-Tromp si e acusacion den prome tanda tabata berdad cu Minister Andin Bikker a actúa contra ley y nos a keda warda e pruebanan y sigur e denuncia oficial contra Minister Andin su mesun colega den Ministerraad.

Di mi parti mi manda e siguiente mensahe: percura pa awo en adelante haci drechi. Atende boso asuntonan interno y no bin parlamento pa resolve bos problemanan. Awo Minister Marisol Lopez Tromp ta bek den su posicion como Minister apunta pa partido POR (paso no por otro manera) y alabes nos ta den tempo dificil y no tin tempo pa atende caprichonan di un partido, ni tampoco nos tin tempo pa perde pa atende cu interes personal. Nos enfoke awo ta interes general y sigur nos problemanan financiero y economico y social, y pa nos por restart bek y stabilisa nos pais. Y sigur no lo tin un proximo biaha!

LEAVE A REPLY

Please enter your comment!
Please enter your name here