Bon Dia Aruba a tene entrevista cu artista local Daniel Croes, kende reciente a bay Hulanda pa sigui su estudio HBO den arte y baile. Entre ambos pais, el a crea su propio marca di paña y ta spera pa yega mercado internacional.

Inpira pa cultura di Aruba cu pasado di China, Croes ta bisa cu di e forma ey el a cuminsa cu su diseño. E parti Chines ta bin di su wela. For di e parti di color, e ta splica cu ta e color natural y crecemento di e isla.

E marca di su diseño ta ‘Different World’, unda cu e ta bisa cada un di su producto tin un mensahe patras di dje. Croes mes ta un diseñador pero tambe ta considera un ‘all around artist’. Su pasion pa baile, fotografia ‘un image creator’ y cantante tambe ta profesion cu e ta enfoca riba dje.

Cuater aña atras, el a cuminsa su mesun negoshi, sinembargo e ta bisa cu e proceso no tabata facil. “Prome mi a pensa kico mi kier haci pa inspira y motiva e generacion. Anto mi a pensa pa e mensahe su tras, pa compronde mas lihe cu bida ta duro, pero mester lucha p’e.”

Croes a dicidi di bay contra e sistema di biba den un mundo unda cu persona ta keda pega pa traha un trabou cu ta gana salario minimo. Anto e kier a mustra su mes, y otro, con fuerte persona por ta.

“Tin hopi talento na Aruba; tur hende tin talento. E ta keda na abo pa scoge y traha duro p’e. Mester pasa den guera pa logra bo meta. Pasobra tin hende ta ‘give up’, anto bay traha den cualkier luga. Por ta cu algun ta bon cu esey, pero tin di nan cu ta canta, baila, pinta, diseña anto e pensamento cu arte no ta yega leu, no ta berdad”, Croes a expresa.

Na final e ta bisa cu ta keda na cada ken pa scoge si nan kier keda, of bay afo. ‘No mester depende di otro hende’. Si nan no ta pensa cu arte lo yuda yega leu, e ora ‘mester demostra nan cu si’; scoge pa bay den guera y convence hende cu si por.

Sinembargo, e ta splica cu tin hopi hende cu tin miedo y no tin balor pa acerca hende. ‘Mester pensa esaki ta momento of nunca’. Di e forma ey el a acerca varios artista pa conoce mas hende y por logra su meta.

“E ta un proceso, mi por bisa di 4 aña. Den baile mes, mi ta bayendo pa 7 aña, pero mi a traha duro pa e cosnan. Claro e ta tuma tempo. No tur cos mester bay lihe, pasobra loke ta yega lihe,tambe ta bay lihe”, Croes ta bisa.

Pa e motibo ey, el a dicidi di diseña a base di color cu ta crece na Aruba. E berde, bruin, geel cu e ta uza hopi, inspira pa color natural di e isla. Anto el a cuminsa traha riba dje. Su intencion ta pa yega rond mundo, cu su marca bira internacional. Actualmente e tin ‘upcoming artist’ cu ta bisti su paña pa asina yuda otro.

“Mi a colabora cu video di A.J Kingz, K.Lito (Africano) R.C. y festival rond di Hulanda.” E ta bisa cu tambe a yega baila pa artista local Jeon, Buleria, Freddy Tromp y Popcorn Dancers, cual e ta bisa, ta logronan importante pa su carera.

A puntra Croes pa e calidad di su paña compara. El a bisa cu nan no ta paña mucho barata pa motibo di e bon calidad cu ta diki pa tapa bon. E tin diseño cla pa hoodie, shirts, petchi, pero mirando un futuro mas amplio cu mas producto, manera mea, lighter y mas.

Un conseho cu Croes tin pa tur esunnan cu tambe kier dedica nan mes pa haci loke nan gusta: E ta bisa cu e tin 4 aña luchando. “E prome aña mi tabata pensa kico mi kier y ta haya interesante, importante pa motiva, inspira e generacion di esunnan mas hoben y hasta bieu. Pero henter e proceso mi a pensa bon riba dje. Mester tin cla kico bo kier.”

Sinembargo, e ta compronde cu por tin momento cu hende kier ‘give up’. Nan kier yora pasobra hende no ta apoya nan. “Na final ta abo tin cu kere den bo mes pa hende por kere den bo.” E ta agrega cu tin momento cu el a haya su mes ta yuda pasobra no ta kere den su proyecto, y ‘asina mi a vence mi miedo’.

“Locual un persona kier logra den bida, un bida saludabel pa asina e pensamento ta positivo. No worry si hende ta duda bo. Abo acepta bo mes y para patras di bo mes, na kico abo kier y asina bo ta logra”, Croes ta expresa.

 

LEAVE A REPLY

Please enter your comment!
Please enter your name here