Aruba Art Fair ta den preparacion pa su di dos edicion e aña aki. E proyecto aki a logra haya mas o menos 1000 bishitante aña pasa y a trece diferente artista di afo pa traha mural den cayanan di San Nicolas, segun e organisadonan. Sinembargo un grupo di artista local a expresa nan mal contento cu e organisacion di e proyecto.

Un di e organisadonan, Tito Bolivar a splica kico e programa lo encera e aña aki. “Manera aña pasa, e proyecto ta bay tin diferente fase, culminando den e dianan 13 te cu 15 di october di e Art Fair mes.”

Sr. Bolivar ta splica cu lo cuminsa bek cu e programa di television Conoce Mi. Den e programa aki, e organisadonan lo purba conscientisa e publico riba e artistanan cu ta participa y nan motivacion pa traha arte. “Nos ta purba scoge un variacion di artistanan di tur tipo, entre otro artista hoben, artistanan conoci, menos conoci, etc. E aña aki nos lo tin 12 episodio, cada un tratando cu 1 artista.”

Un otro aspecto di e proyecto, sr. Bolivar ta splica cu lo duna varios scolnan canvas nan pa e muchanan por expresa nan mes. Tambe nan lo organisa un show di moda yama Fashion Meets Art.

Sr. Bolivar ta splica cu e diferente proyectonan aki tin intencion pa conscientisa e Arubano tipico riba topico di arte y trece mas interes pa arte en general.

Preocupacionnan di artista di graffiti

Artista di graffiti local Jeff Valera cu tabatin interes pa participa e aña aki a declara na Bon Dia Aruba cu ‘mi no tin interes pa apoya e organisadonan, si no pa apoya e movemento di arte riba Aruba’.

E artista ta bisa cu aña pasa el a wordo invita pa ta un di e artistanan local cu lo pinta un mural pa e evento. “E organisadonan a bisa mi cu posiblemente nan lo por haya un espacio pa mi mural.” E organisadonan no a duna e artista un luga, en fin.

Sr. Valera a splica cu el a participa cu un tayer organisa pa e Art Fair y el a remarca cu e tabata un di e poco personanan cu experiencia den graffiti den e tayer. “Mi ta sinti mi mes na mesun nivel cu e personanan cu a wordo treci di afo. Mi ta trahando cu graffiti desde 2005. Riba esaki mi ta biba na Aruba.” Sinembargo el a traha un graffiti riba un muraya pero na cierto punto e organisadonan a nenga di duna mas spray can.

Segun e, te hasta e persona cu a duna e workshop, un artista di graffiti di afo kier a dun’e un chens pa sigui. Pero segun e artista prome ‘e organisadonan no kier a duna mi mas spray can pasobra mi lo caba cu tur.’ Despues di esaki e mes a bin cu su material pero e ora e organisadonan a bis’e cu e problema no tabata e spray can, si no e espacio rekiri pa haci e trabou.

“Mi no a keda cu un bon sintimento, specialmente pasobra mi ta representa e artistanan local, cual no a haya ningun mural na San Nicolas. Si tin placa pa trece artistanan di afo, dicon no tin placa pa sostene e mesun hendenan local?”

Participacion den Aruba Art Fair 2017

E aña aki e artista bolbe haya un e-mail cu un invitacion pa aplica pa un participacion cu e evento. Sinembargo, e actitud di e organisadonan encuanto su participacion den aña 2016 no ta kita cu e lo kier participa. Sr. Valera lo purba un bes mas pa participa. “Si mi haya chens pa pinta, mi lo pinta. Mi ta laga problema na banda. Pa mi ta mas importante e movemento di graffiti y cu tin mas interes den esaki riba e isla.”

Potretnan di graffiti ta trabou di Jeff Valera y a wordo ofreci pa e artista.

A purba haya contacto cu Tito Bolivar pa duna su banda di medaya pero no a logra cu esaki. Nos di redaccion lo sigui purba haya comentario y lo reporta riba esaki den un proximo edicion.