Recientemente Aruba su nomber a briya na nivel internacional danki na e atletanan di artistic gymnastics di Avanse Club Gymnastico Arubano y Gihae Gymnastics cu a biaha pa Mexico y Panama pa representa Aruba den dos torneo internacional di gimnasia.
E atletanan di Avanse Club Gymnastico a competi na Cancun, Mexico, den e Copa Internacional Gilling 2023 cu a tuma luga for di 4 di october pa 8 di october.
A traves di diferente publicacion ariba rednan social por a tuma nota di e gran exito cu e atletanan a conkista na Mexico. Un cantidad di medaya den diferente categoria y nivel, entre otro un puntuacion perfecto pa e hobencita Salome Croes den su rutina di floor cu a ricibi un standing ovation di e publico presente.
Den e mesun siman atletanan di otro club di gimnasia di Aruba, Gihae Gymnastics, tambe a representa Aruba na Panama den e Copa IGA Internacional 2023.
Varios atleta a competi den diferente categoria y nivel demostrando nan talento y habilidad logrando un cantidad excepcional di medaya lagando Aruba su nomber resona ariba e plataforma internacional.
Durante ambos competencia Aruba su muchanan a sobresali y e resultadonan, un cantidad impresionante di medaya, a demostra e talento, compromiso, dedicacion y profesionalismo di e atletanan den e deporte di gimnasia artistico.
