Aruba den centro di atencion di mafia internacional

Historia ta ripiti? Den añanan sesenta di siglo pasa, Aruba a logra subi lista di pais exportado di koffie, sin cu tabatin un solo mata creciendo na Aruba. Kico tabata sosodiendo? Un comerciante Arubano astuto tabata probecha di e posibilidad di saca koffie di contrabanda di Colombia, mientras cu autoridadnan aya y aki tabata ‘look the other way’. Hinca mercancia den otro saco, y cla! Asina Colombia tabata scapa di e cuota obligatorio pa exportacion di koffie, imponi pa e Organisacion Internacional di Koffie y di e manera aki tabata cobra algo ainda pa su exceso di koffie, y e comerciante tambe a gana. E tempo ey e no tabata yama ‘win win’ ainda…

E complot cu Bloomberg a trece na luz di publicidad e siman aki ta uno den un situacion mas serio, ya cu ta trata di sancion internacional contra un pais cu ta hibando un guera interno, cu a costa bida di algun cien mil di ciudadano. E plan finalmente no a tuma luga, pasobra no a yega na un situacion den cual por a reactiva e refineria pa efectivamente procesa e crudo cu lo a bin di Siria. Kico a pasa exactamente nos no sa (ainda), contal cu e deal cu cierto persona tabatin na mente, no a cristalisa. Pero si ta parce sigur ta cu a yega na entrevista/reunion cu nos mandatarionan, segun declaracion di e personanan envolvi, menciona pa Bloomberg. Y tur esaki ta trece den nos memoria e encuentronan cu a tuma luga entre representantenan di gobierno cu e persona Chavista Ruperti, hunto cu otro delincuente grandi manera ‘El Pollo’ Carvajal y Roberto Rincón. Despues di Ruperti, a sigui cu e alternativa ‘Rincón’? Te cu esaki tambe a cay afo ora Merca a laga cer’e? Anto e ora no mas, a bin riba e alternativa ‘Citgo’?

Kico tur esaki ta bisa nos? No ta cuestion solamente di e aventura cu Syria, sino e comunicacion continuo cu e delincuentenan Venezolano alrededor di PDVSA! Esaki ta e situacion preocupante, cu tur e hendenan aki di reputacion dudoso, tabata permanece pa mas tempo na Aruba, den comunicacion directo cu nos mandatarionan, hasta na momento cu, manera e caso di Carvajal, nan tabata riba lista caba di persona busca internacionalmente. Henter e situacion aki ta haci cu nos mester puntra nos mes si a yega un fin na usa Aruba como ‘safehaven’ di delincuencia internacional, cu conocemento y colaboracion di autoridadnan Arubano? O si ta reina e mesun ambiente di duna bonbini na e delincuentenan Venezolano aki, cu den e añanan reciente a bira biyonario, hortando na grandi di nan mes pueblo, te tal extremo cu awor nan ta haya nan mes obliga di busca resto di cuminda riba dump? Esaki ta e tipo di hende cu ta haya porta habri na Aruba ainda?

E señor Ruperti ta e mesun persona cu na Venezuela ta conoci como esun cu ta pagando abogado pa e dos ‘narcosobrino’ di e pareha presidencial, cu tabata organisa nan vuelonan di droga for di e rampa presidencial na Maiquetia, anto presidente di e pais no tabata sa? Ta esaki ta e presidente cu nos gobierno a bay bishita na palacio Miraflores, pa firma e convenio tocante e rehabilitacion di e refineria aña pasa? E mesun Nicolas Maduro cu recientemente a keda acusa na Brasil di a tuma 11 miyon dollar pa campaña presidencial di Chavez for di Odebrecht, e empresa mas escandaloso Latino Americano di ultimo siglo? Ta ki dia nos representantenan gubernamental ta yega na comprende cu ta miho keda leu di e tipo di hende aki, na luga di duna nan un trato preferencial aki na Aruba.

Un pregunta ta pakico e deal finalmente no a sigui. Gobierno Mericano o gobierno di Hulanda lo a adverti gobierno di Aruba pa no ‘hunga cu candela’? Otro posibilidad ta cu segun e conflicto na Siria a intensifica, e posibilidadnan pa exporta a cay masha hopi mes. Di un produccion di mas di 500.000 bari pa dia, Siria apenas ta produciendo 30.000 bari pa dia actualmente. Nada straño pa un pais meymey di un guera civil horibel, cu miyones di persona huyendo di e pais. Por ta cu esaki a ‘resolve’ e asunto pasobra e cantidadnan menciona den e articulo ni remotamente ta cuadra cu loke Siria ta produciendo den e ultimo añanan?

Por ta, pero e situacion awor ta lanta otro pregunta tambe. Ki sorto di ‘deal’ tin ainda den e dos mil pagina di texto di e acuerdo cu PDVSA, cu Aruba no por a haya pa mira? Keto bay tin un maneho di ‘bonbini’ ainda pa tiponan manera Ruperti? Cuanto mas di e delincuentenan aki nos tin na Aruba, cu a bira rico riba custia di nan mes pueblo? O por ta cu ta net e mentalidad ey a cuminsa cria reis na Aruba tambe, unda enrikece bo mes ora bo ta den posicion di mandatario, no ta un pica mortal mas, al contrario, e ora bo ta ‘smart’? No ta importante mas cu ta net esey ta loke bo a hura cu bo no lo haci, dilanti representante di Rey?

 

You May Also Like

editorial 2_15_1.jpg

Parkietenbos no tin prioridad? 7 aña di papia y sin solucion…

Un parti di sanidad publico cu nos no a toca den nos editorial recien ...

Situacion na Venezuela: Entre miedo y realismo

Di repente e situacion na otro banda di awa a bira hopi mas tenso, ...

Ley di integridad mancaron

Tin elemento contra constitucion Tratamento di e ley riba integridad di mandatario a duna ...

Betico mira di otro angulo

Curashi pa haci loke mester haci Den e dianan aki nos ta custumbra di ...

editorial 2_15_1.jpg

Parkietenbos: Solucion no ta solucion

Dump cerca EcoGas ta mas molester ainda… Manera cu e avalancha di critica a ...

editorial

Eman mester soporta Marisol por lo pronto, Porfin un presidente neutral?

E retiro di presidente di Parlamento for di fraccion di partido AVP no a ...