Aruba financieramente ‘on schedule’, pero e ta ‘on track’ tambe…?

CAft a publica su comentario riba e informe di gobierno tocante e desaroyonan financiero den e di dos kwartaal di e aña aki. Den lineanan general por bisa cu gobierno por a presenta e cifranan cu a anticipa, sin sorpresa grandi. Esey naturalmente no ta implica cu no tin punto di atencion, y hasta di preocupacion. Por ehemplo, cu e gastonan di personal a keda na mesun nivel, mientras cu e acuerdo ta cu mester logra un reduccion di Afl. 12, 2 miyon, di Afl. 482,9 miyon na 2017 pa Afl. 470,7 e aña aki. CAft ta haya cu e gastonan adicional di personal pa e plan di crisis social no ta kita e acuerdo haci y cu mester crea anto e espacio financiero bahando gasto na otro luga den e gastonan di personal.

Manera CAft ta indica, esey tin como consecuencia cu den e segundo mita di aña henter e operacion aki lo mester tuma luga ainda. Tambe e colegio  ta informa gobierno cu nan lo desea di haya informacion a corto plaso con gobierno tin pensa pa recorta e presupuestonan di e departamentonan pa yega na tal austerisacion.

Un señal cu en berdad ta trahando riba e tema aki tabata e accionnan di duanero, cu tabata tocante e medidanan cu e minister encarga lo kier haci. Pa e minister, y e gabinete, e resultado positivo den corte por significa cu nan por keda libra di un ola di accion sindical riba cada plan pa cada departamento individual, pareu cu haya sa kico ta e intencion di gobierno.Na e riesgo ey hues a pone un paro, di cual otro sindicato tambe mester tuma bon nota. Di tur manera, pa october ta programa e cambio di ley di presupuesto pa acomoda e austerisacion aki, unda sin duda lo bin un discusion fuerte riba e efectonan.

Pa loke ta entrada di gobierno tambe tin algun detaye cu merece mencion. Por ehemplo e caida bastante fuerte den entrada di winstbelasting, cu no ta algo sorprendente y no tin di haci cu accion di e actual gobierno, sino mas bien cu e medidanan cu e anterior gobierno a tuma pa cambia e metodo di cobranza di e impuesto aki. Esey pa algun tempo a crea un acumulacion di impuesto di varios aña, pero e ‘bubble’ ey a pasa y tabata previsto e caida nota.

Pa loke ta e entradanan di dividendo cu gobierno tabatin programa, ta notabel cu gobierno a cobra practicamente tur dividendo caba. Remarcabel ta e Afl. 10 miyon cu a haya di parti di Utilities Aruba NV; no pa e suma mes, sino mas bien pa e debate cu tabatin encuanto e inversionnan cu por bira necesario pa WEB atende e problema di huma dañino. Si bo ta premira inversion grandi necesario, lo mester considera no paga dividendo, o paga menos… En todo caso, e cuentanan anual di WEB ta mustra resultado solido tanto pa 2015 como 2016, mientras cu esun di 2017 no ta disponibel ainda. De paso mester bisa cu CAft a haci un observacion tocante e cuentanan anual di tur e entidadnan liga na gobierno y cu ta conforma e ‘collectieve sector’, esta cu nan no a haya ningun pa wak ainda. Esaki ta un poco straño pasobra si ta duna CAft cifra di dividendo paga, supuestamente di e resultado empresarial di 2017, esey lo mester ta a base di un cuenta anual aproba pa e gerencia/accionista.

Nos ta kere cu ta na su luga un biaha mas solicita gobierno encarecidamente pa no duna CAft so e cuentanan anual, sino duna henter pueblo acceso na esakinan. Na e momento aki ta algun entidad di e sector colectivo so ta cumpli cu nan obligacion di transparencia, manera WEB y Banco Central. Y enfaticamente nos ta bisa tambe cu e problema aki no ta legal, sino mas bien 32 aña di falta di boluntad politico pa cumpli cu e responsabilidad aki.

Di regreso na e cifranan di prome mita di aña, por constata cu cosnan ta cana manera predeci. E incertidumbre principal lo bin sin embargo den e segundo parti di aña, ora bira conoci con e medidanan fiscal, e aumento di BBO/etc. lo bay resulta pa loke ta e crecemento economico. E aumento general di prijs como consecuencia di e aumento di BBO/etc. ta afecta e placa disponibel pa consumo, y ta depende si tin un cierto crecemento economico pa por compensa esey. Di parti di turismo tin un desaroyo faborabel, mientras di e refineria no por spera nada.

Tabatin bishita halto siman pasa, cu a bin haci promesa atrobe, y ni nobo, mientras cu na mes momento e siguiente decision a cay den corte na Merca, cu si Venezuela no pone un garantia, ta habri paso pa e benta proximamente di e compania matriz di Citgo, PDV Holding.  Esey lo trece un situacion completamente nobo pa nos, cu na e momento aki ta dificil pa evalua. En todo caso tabata un bon decision di gobierno pa no conta mes cu algo positivo tocante e refineria pa posicion financiero di gobierno. Bista por ta fiha riba e siguiente informe, cu lo duna mas detaye riba e cambionan di rumbo financiero cu gobierno kier logra.

You May Also Like

Partido den gobierno no a haci falta den debate

Bon oportunidad pa duna informacion E debate di/pa ‘milennials’ no a bira un evento ...

Poco cambio den panorama economico

Retraso mas grandi ainda den inversion pa refineria? Con nos economia ta manehando den ...

editorial 2_15_1.jpg

Turbulencia riba nos continente …Venezuela y Brasil ta lidera..

Den dos pais di continente sur Americano tin turbulencia hopi grandi, tanto den economia ...

Cifra dudoso den analisis AIB

Cu bastante fanfaria atrobe a publica e partinan aparentemente clave di e rapport di ...

Sabiduria a prevalece Parke Nacional Arikok den bon man

Mester bisa cu hues den e caso trata ayera encuanto e situacion na fundacion ...

CAFT ta duna beneficio di duda

E ofensivo di propaganda di gobierno a cuminsa move seriamente, loke tabata di anticipa cu ...