Diasabra pasa a celebra Aruba Health Fair na AZV ubica na Rumbastraat. Despues di 4or di atardi, e publico presente a cuminsa drenta y cana pa e ‘islanan’ di prevencion, cuido di hende grandi, AZV general y prevencion, den un dia diferente, yen di musica, diferente actividadnan y conocemento pa e cuido di salud.

Bon Dia Aruba a entrevista Joost van de Kamp, trahado na AZV di e departamento di comunicacion, kende a manifesta cu esaki ta e prome biaha cu AZV ta planea e Aruba Health Fair. Nan a invita tur organisacion cu ta traha den salud, prevencion, cuido y tambe di movecion y comemento saludabel, pa presenta nan mes pa nos clientenan pa e pueblo di Aruba.

Tambe el a bisa cu henter comunidad mester sa cua tipo di escogencia por haci pa nan ta saludabel, y hende tabatin oportunidad di yega na stand di AZV, y tambe otro, por ehempel clinicanan di Colombia, cu a bin pa e feria aki pa duna informacion pa e publico cu a asisti.

Di su parti, Liliana Saez, trahado di Hospital Universitario San Ignacio di Bogota, Colombia, nan a bin invita for di AZV pa asisti pa e feria aki, pa splica e contacto cu nan tin cu AZV relaciona cu pashentnan cu mester bay Colombia pa cuido.

Sra. Ruth de Kort, cu a asisti na e feria aki, a bisa cu ‘ta un bon iniciativa cu comunidad mester pa nan sa y cuminsa cu un miho estilo di bida’.

Cu presentacion di D’licius y otro banda musical, Aruba Health Fair a presenta pa e comunidad di Aruba e unico feria riba cuido di salud cu hopi ambiente y entretenimento.

 

LEAVE A REPLY

Please enter your comment!
Please enter your name here