Aruba a keda na di 3 luga den Copa ABC

E ekipo campeon di futbol division di honor di Aruba di aña 2016-2017, esta Coca Cola Nacional a competi den e A-B-C Cup na Boneiro y a keda na di 3 luga. Diabierna anochi nan a hunga contra Real Rincon y a perde e wega aki, mientras cu diadomingo nan a topa Uruguay di Boneiro. Nan a bay cu e victoria riba e team di Boneiro cu e score di 4-2 y asina a keda na di 3 luga.

Coach di Coca Cola Nacional, Dreyer Bracho a indica cu e wega di diadomingo tabata mas miho cu diabierna, unda e team a haci nan esfuerso pa keda na di 3er luga y tabata un lastima di no a trece e trofeo pa Aruba. Den 10 minuut di wega di diabierna e prome carchi cora a cay y esaki a pone cu Coca Cola Nacional mester a cambia nan planificacion. Nan a hunga cu 10 hungado, pero nan no tabata por a bay cu e victoria. Leo Colmenares a anota e gol pa Coca Cola Nacional contra Real Rincon. Aunke cu Coca Cola Nacional no a bay cu e trofeo, e organisacion ta na un nivel bon organisa cual ta pone cu futbol ta bay dilanti, asina Dreyer Bracho a elabora. Diadomingo nan a topa Uruguay di Boneiro, unda cu nan a bay cu e victoria di 4-2. E golnan anota tabata haci pa Devis Oliveiro (2), Jorgue Bedolla (1) y Leo Colmenares (1).

St. Fundacion Lotto pa Deporte tabata na Boneiro, unda nan a bay duna sosten na e team campeon den di futbol division honor 2016/2017 Coca Cola Nacional. mr. Di-Stefano Wernet RA, a indica cu desde e momento cu Arubaanse Voetbal Bond a acerca nan pa yuda cu e proyecto di rebiba e campeonato Antiano, e fundacion a dicidi cu nan lo haci esaki. FLpD ta contento cu e resultado di Coca Cola Nacional, unda cu Di-Stefano Wernet a elabora cu no tur ora gana ta mas importante pero e fair play tambe y e honor pa participa. “Nos ta desea pa otro aña, Arubaanse Voetbal Bond acerca e federacionnan di Boneiro y Corsou pa por organis’e na Aruba”, asina Di-Stefano Wernet a expresa.

Frans Dijkhoff, miembro di directiva di Arubaanse Voetbal Bond, tambe tabata presente na e prome encuentro di A-B-C Cup, unda cu Coca Cola Nacional a representa Aruba. El a elabora di ta orguyoso pa mira e esfuerso cu Real Rincon a haci pa por a trece e torneo na Rincon. “Aruba no por a gana e prome wega, pero mi ta masha contento cu Aruba a keda na di 3 luga”, asina el a expresa. Presidente di AVB, Richard Dijkhoff a bisa su persona cu esaki ta e caminda cu lo lanta bek Copa Antiano, unda cu e directiva ta para tras pa lanta e campeonato aki bek, pa asina duna CONCACAF of FIFA e formula pa lanta bek futbol den region. E intencion ta pa bay traha duro y trece e A-B-C Cup Aruba pa asina tur hende por mira esaki.

You May Also Like

Playoff Femenino Heineken di Aruba Softball Bond a continua

Campeonato HEINEKEN di Aruba Softball Bond dedica na dos baluarte Sra. Bertha Wolf Croes ...

Aruba representa pa 2 ekipo na Surinam na evento di TK5

Durante weekend cu a pasa tabata tin training pa forma e ekiponan cu lo ...

Royal Power Tat Fat Home Depot campeon den liga AA

Campeonato HEINEKEN di Aruba Softball Bond dedica na dos baluarte Sra. Bertha Wolf Croes ...

S.V. RCA. a gana Deportivo Nacional y a pusha pa un di 3 wega

Diasabra anochi a tuma luga e di 2 wega di final di e campeonato ...

50 empleado a participa na e MetaFit bike ride

Riba un diasabra mainta MetaFit tabatin su bike ride, unda cu mas o menos ...

Joshua Klabér a gana plata y Záhyon Klabér a gana oro na e di 10 Surinam Open

Director di Banco di Seguro Social (SVb),  Edwin Jacobs a expresa su satisfaccion con ...