Den luna di Augustus y September di e aña aki, tur hende por corda con practicamente tur atardi, tin huma preto ta Sali for di dump na Parkietenbos, ora cu desconocinan pega sushi na candela.
Mesun cos por a ripara casonan di atraco cu tabata tuma luga tras di otro, casonan sumamente sospechoso pero cual nan a wordo uza como tema politico contra di Gobierno di AVP.
Melvin Tromp di partido AVP ta mustra cu diripiente awor cu eleccion a pasa, practicamente ningun di e dos desaroyonan negativo aki, ta tumando luga, es mas nan a disminui por completo loke ta bolbe demostra con ley politiconan ta capaz di yega pa logra voto for di pueblo.
“Den luna di september practicamente tur atardi por mira huma y candela ta Sali for di e dump na Parkietenbos y pa su dia siguiente por scucha politiconan bay prensa y papia cu asina nan drenta gobierno, lo tin solucion pa e dump aki.
Tin cu a priminti cu den prome luna di gobernacion nobo di e gobierno nobo, lo tin solucion pa e dump di Parkietenbos mientras cu otronan tambe a mustra cu nan tin solucion pa atende cu e ola di atraconan cu tabata tuma luga.
Desde cu resultado di eleccion a bira conoci, pueblo por tuma nota cu den ambos situacion, e casonan a keda reduci casi por completo ya cu en realidad no mester di e propaganda negativo aki mas pa campaña electoral.
Ta e tipo di desaroyonan aki ta pone pueblo pensa cu tur e candelanan riba dump, e casonan di atraco cu tabata tuma luga, por wel bien a forma parti di campaña di algun partido politico, pa asina gana simpatia y confiansa cu mester a traduci nan mes den votonan pa e politico- y partidonan aki.
Un mentalidad cu ta di rechasa totalmente, ya cu ta un forma cla con ta gaña un pueblo cu no merece e tipo di maniobranan baho aki y cu merece un investigacion sea aworaki mes of den futuro, ya cu si ta asina, e tipo di mentalidad aki ta inaceptabel.
Na e dump di Parkietenbos ciudadanonan cu ta cana den oranan di atardi por mira practicamente tur atardi despues di 6’or, con huma ta cuminsa sali for di e dump aki mientras cu ya caba tin algun siman cu no ta mira nada di candela riba e sitio aki.
Un politico of su partido cu ta presta su mes pa e tipo di actonan baho aki, simplemente no merece di ta den gobernacion di nos pais, ya cu na final di cuenta nan no tin solucion real pa ningun problema di pueblo pero al contrario na luga di soluciona e politiconan aki ta fabrica mas incertidumbre y engaño den nos pueblo.
Ta di condena e forma cu a hiba campaña cu e topiconan aki ya cu nos hendenan no merece e tipo di trato aki,” sr Melvin Tromp di partido AVP ta mustra.
