Recientemente Premier Wever-Croes a consulta cu Conseho di Minister di su gabinete Wever-Croes, y posteriormente el a ser pidi pa atende e reunion na Hulanda pa asina confronta y enfrenta Rijksministerraad riba e situacion cu Aruba actualmente ta aden.

Ta asina cu despues di e cambio di ley di LAft cu a pasa den Parlamento, Hulanda a laga sa cu e ta poco dificil pa nan por acepta y biba cu e decision aki y p’esey tambe tabata na su luga pa Prome Minister atende e reunion aki pa splica Conseho di Minister di Reino cu, pa Gobierno di Aruba, nada a cambia cu e decision aki. Pa Gobierno, e protocol y normanan cu a wordo firma cu Hulanda, ta loke ta valido y loke Gobierno ta cumpli cu ne.

Segun Premier Wever-Croes, supervision ta sumamente importante, Aruba sin supervision no ta posibel mas p’esey tambe na aña 2015 ora cu e gobierno anterior a bin cu e ley aki, Fraccion di MEP no tabata di acuerdo cu ne. Tabatin varios alternativa riba mesa y un di nan ta pa bin cu un propio Camara Presupuestario.

E prome mandatario Arubiano a splica tambe na Conseho di Minister di Reino cu Gobierno ta trahando riba e alternativa aki pa e supervision cu lo reemplasa CAft, cua ta nos propio Camara Presupuestario. E ley mester wordo entrega na Gobierno pronto, pero mirando e cambio aki den Parlamento, Gobierno ta bay acelera e proceso pa bin cu Aruba su propio Camara Presupuestario.

“Pa cu esaki mi a indica na Conseho di Minister di Reino cu nos mester tin tempo. Pasobra nos no ta cla cune. Tampoco nos lo traha un cos pura den presion di tempo. Nos lo traha algo bon y firme. E Camara Presupestario cu lo reemplasa CAft, lo tin supervision y ta bay ta den man di pais Aruba, segun nos constitucion. Tambe mester ta bon hinca den otro pa asina haci e trabou di supervision adecuadamente”, Prome Minister a enfatisa.

Ultimamente tabatin hopi rumor cu Aruba lo haya un ‘aanwijzing’. Esaki sinembargo, segun Prome Minister, no ta posibel pa Aruba. Aruba por haya un KB, pero no un ‘aanwijzing’. E ultimo aki por bay pa Sint Maarten of Corsou si. Tambe tabatin rumornan cu lo bin un KB pa Aruba, cu tampoco tabata e caso. Pa cua motibo tambe, Prome Minister Evelyn Wever-Croes a dicidi di bay su mes Hulanda y atende Conseho di Minister di Reino pa aclaria esaki tambe.

“A indica Hulanda cu Gobierno di Aruba sigur mester tin mas tempo den e simannan nos dilanti. Pa mi tabata importante pa splica nan kico Gobierno di Aruba ta haciendo pa trece e trankilidad na Conseho di Minister di Reino. Nan a indica e ora tambe cu no tin necesidad pa rush pa trata e tema aki y cu nan lo bay hunto cu e trankilidad cu nos ta trahando. Pero si nan a kier mira cu Gobierno ta cumpliendo, cual ta e caso tambe”, Prome Minister a indica.

E bon noticia, Prome Minister Evelyn Wever-Croes ta enfatisa, ta cu no tin niun instruccion, ni KB cu ta tumando luga. E relacion den Reino ta stabiel y sin friccion y esaki tambe ta loke Gobierno di Aruba ta traha pe.

“Esaki ta duna nos espacio pa e siguiente simannan pa nos sigui traha riba nos propio Camara Presupuestario, y manera cu esaki wordo finalisa, Gobierno lo duna tur informacion tocante esaki”, asina Prome Minister Evelyn Wever-Croes a duna di conoce.