Segun nos a comprende, nos gobierno ta bao presion pa habri frontera (aereo) pa vuelo entre Aruba y Venezuela. Esaki principalmente pa scapa existencia di un compania local di aviacion, di capital Venezolano asina leu cu nos informacion ta yega. Gobierno di su banda ta cuidadoso cu tuma e paso aki, pasobra esey por habri porta pa hende yega aki y reclama un status di asilo politico. Ora esey mester sucede nos lo mester tin cu cumpli, pasobra esaki lo ta e prome pais unda nan ta pisa tera despues di sali di Venezuela.

A trece e idea tambe di un tipo di ‘waiver’ cu un persona lo mester firma prome cu e sali di Venezuela, cu mester libra nos di e problema. Sin embargo, e pregunta ta si e waiver ey ta bay kita e derecho di un persona, unavez cu e yega aki, pa reclama su derecho di tur manera. Ademas ta keda e asunto di principio cu ora ta dicidi como Reino pa mantene frontera cu Venezuela cera, anto mester keda actua hunto. Tanten no tin un situacion cu henter e frontera entre Venezuela y e islanan por habri simultaneamente no mester haci esey tampoco.

Naturalmente nos ta haya e argumentonan di banda di e compania di aviacion cu ta teme pa su existencia si e frontera no habri. Anto kico? Nos mester core cumpli como pais? Kico a pasa tur e tempo cu e frontera tabata cera? Nan a sinti falta di e ciere? No, pasobra nan tabata bula riba otro destino(nan) y no tabatin mester di e ruta riba Venezuela. Awor nan a descubri e ‘niche market’ ey anto nos mester cumpli?

Pero nos tin cu tene cuenta cu un aspecto di interes general, di nos y di Venezuela. Y nos no ta papia di interes di e narcoregimen cu tin e pais den un gara mortal, sino di interes di e ciudadano comun y coriente, cu ni sikiera tin di come, te pa nan tin placa pa bula bay Merca. Esnan cu tin placa por bula via Panama o otro lugar pa nan yega aya. Pakico e posicion fuerte aki? Den Reino tin un consenso cu e regimen di teror aki mester disparce. Reino Hulandes tambe, manera Union Europeo, no ta reconoce Maduro y su gobierno como legitimo. Y como cu na e momento aki ta importante pa pone mas tanto presion posible riba e regimen pa logra cu no solamente ta negocia, manera ta tumando lugar na e momento aki na Barbados, pero cu esaki lo tin un resultado positivo pa democracia y libertad pa e ciudadano di e pais. Na un momento asina ta logico pa no facilita nada na e regimen aki, cu te na e momento aki no a demostra di ningun manera cu nan ta dispuesto pa sikiera para e persecucion salvahe contra oposicion. Despues di bishita di Alto Comisionado pa Derecho Humano Michelle Bachelet y emision di su informe tocante situacion di derecho humano na e pais, por a scucha nada mas cu insulto di banda di Nicolas Maduro. Anto esaki ta e momento pa duna e dictador aki un regalito pa e por bay gaba cu Reino Hulandes a ‘suavisa’ nan maneho pa cu su gobierno? Absolutamente cu no.

Nos sa cu riba e isla aki nos gusta limita nos horizonte te unda nos ta mira lama. Sin embargo, tin di e momentonan unda nos mester tene cuenta cu tin un mundo mas grandi eyfo. Y cu nos no por defini tur cos for di e perspectiva di nos economia y nos empleo. Ademas, ta cuanto aerolinea a bay ‘belly up’ caba den ultimo añanan, sin cu a saca man pa yuda nan. Y den caso cu gobierno, na por ehemplo Curaçao, a hinca man den caha gubernamental y saca mas di 30 miyon florin pa inverti den un compania, kico a pasa seguidamente? Bancarota, placa benta afo.

Aviacion ta un mundo riba su mes, cu ta biba segun su propio reglanan. Den ultimo decadanan nos a experimenta varios fracaso den e sector aki, fundamentalmente pa mismanagement. E tentacion t’ey semper pa ‘pensa demasiado grandi’ na lugar di concentra riba e tipo di transporte aereo cu e comunicacion entre e islanan ta exigi. Despues ta bin e conexion cu destinonan riba continente cu ta rekeri bula cu avion mas grandi, cu tur consecuencia cu esaki ta trece cune pa loke ta overhead. Nos a lubida con y pakico Air Aruba a yega na su fin? Y nos a lubida caba cu vuelo riba Venezuela a bira tumba di algun otro aerolinea cu nunca a mira nan placa mas? Tur esaki no mester sorprende ningun hende pasobra den e caso di Venezuela nos no ta papiando di un situacion normal, sino di un ‘rogue state’ cu ta haci y deshaci den su teritorio manera nan ta haya ta bon.

Ta pakico Merca, Union Europeo y mayoria di e paisnan riba e continente aki ta consciente cu mester limita e capacidad di operacion di e dictadura malvado aki cu sancion y prohibicion, pa obliga nan bay den direccion di un solucion negocia. Anto nos mester contribui di nos parti tambe na un Venezuela ‘normal’: laga e frontera ey cera.

 

 

LEAVE A REPLY

Please enter your comment!
Please enter your name here