Recientemente e seleccion di futbol di damas Aruba U-14, a titula campeon den e Caribbean Football Union-CFU Girls Challenge Series na Republica Dominicana. Bon Dia Aruba tabatin e oportunidad di combersa cu e Head of Women Development y Team Manager, Dyane Wiersma, ken a conta con e preparacion di e team y e experiencia durante e campeonato tabata.

Sra. Wiersma ta splica cu como e Head of Women Development di AVB, Sra. el traha un plan strategico pa cuminsa desarroya futbol di damas na Aruba, mirando cu actualmente no tin categoria di damas di U-14, compara cu mucha homber cu si tin U-14, U-15. Pa mucha muhe actualmente tin un open class caminda tur hende di diferente edadnan ta hunga bruha, e ora Sra. Wiersma a inicia cu e academia di damas U-15.

“Nos a haya e oportunidad pa participa den e Caribbean Football Union-CFU Girls Challenge Series, e ora mi a bisa pa nos logra bay cu un seleccion pa competi na esaki nos mester traha di un academia anto e ora na mei nos a cuminsa cu e academia di damas U-15, dus muchanan bou di 15 aña ta cay den esaki anto asina mi a cuminsa recruit mucha muhenan cu ta hungando cu muhca homber of mucha muhenan cu ta den academia priva di futbol anto asina nos a logra cera un 30 mucha muhe cu a wordo yama”, Sra. Wiersma ta splica.

E ta conta cu e proceso pa selecta e seleccion final a cuminsa cu un grupo di 30 mucha cu a train un of dos biaha pa asina e coachnan por a wak e nivel di e hungadonan. Despues di e trainingnan e coach a dicidi di split e grupo den dos basa ariba e nivel di muchanan y asina e staff a kies e seleccion cu a biaha pa Republica Dominicana. E seleccion a train desde luna di mei te cu augustus prime cu nan a biaha, y aunke e preparacion tabata cortico, Sra. Wiersma ta bisa cu ta pa e motibo ey mes nan ta sumamente orguyoso di e logro di e muchanan.

Wiersma ta splica cu su mes a hunga futbol den pasado y cu semper e tabata un challenge pa cabayeronan coach of compronde e damanan. Pa e motibo aki el a dicidi tambe di haci e staff tecnico completamente di damas. “Tur coach tabata hendenan muhe cu eigenlijk a caba di haci curso di coaching hunto cu AVB prome cu mei, anto e ora di eynan mi a dicidi di escohenan y duna nan e oportunidad di traha cu e mucha muhenan y ya el a bay bon”, el a bisa.

“Nos a gana invicto, nos no a haya ni un gol contra. Nos tabatin 23 goal anota durante full e campeonato y un di nos hungadonan, Ellen de Jong tabata e goal getter di full campeonato tambe, dus esey tambe ta un otro logro grandi pa nos”, el a agrega.

Sra. Wiersma ta conta tambe cu e saki ta prome biaha den historia cu Aruba a bay un campeonato internacional cu un team di damas U-14 y cu esaki tabata un experiencia inolvidabel pa tur, pero specialmente pa e muchanan. “E muchanan tabata hopi disciplina, cu hopi gana di gana. Nos a forma echt un union durante full transcurso di training cu tur esey. “, el a bisa. “Sigur pa nan e tabata un momento inolvidabel paso semper nan a hunga futbol cu mucha homber y no den un team di mucha muhe, dus ta prome biaha cu nan tur a experiencia un team di mucha muhe internacional, cu staff muhe so, dus nan tabata full contento cu nan tabata por ta parti di esaki”.

E capitan di e team, Bindiya Wadhani, tambe a conta con su experincia tabata na Republica Dominicana. “E tabata mi prome biaha cu mi a biaha pa futbol anto e experiencia tabata hopi dushi mes. Mi ta kere e team a echt sinti manera un famia y nos tur a traha duru pe”, el a bisa. “Ami mes, prome cu nos a bay, no a kere nos lo yega asina leu. Ami mes como hungado a bay pa e experiencia, no pa gana of perde pero pa e experiencia y te ainda mi no por kere cu nos a coi campeon”.

Un otro miembro di e team, Kim Schoppema, tambe a conta con el a sinti y su experiencia personal durante e campeonato. “Mi ta haya el a bay hopi bon y cu nos a train asina tiki tempo toch loke nos a logra tabata hopi bon. Mi ta hopi orguyoso cu nos a tabata invicto y tambe con tur mucha a bira bon cu otro y cu e coachnan tambe. Mi a sinti hopi bon, hopi orguyoso di mi mes y full e team y e coachnan”.

E la duna un mensahe na tur mucha cu kier haci sport, specificamente futbol tambe. “Purba futbol, nunca no tin miedo pa hacie y nunca tende di e hendenan cu ta bisabo cosnan negativo, djis sigui bay pe”.

Sra. Wiersma ta remarca cu e succes di e muchanan ta danki na e mayornan tambe. “Gran parti di e succes tabata danki e mayornan”, el a bisa. Hopi mayor a eigenlijk biaha bay Republica Dominicana, y mi ta kere e support system cu e muchanan tabatin a haci cu nan tabata hunga cu mas confiansa, mas trankilo paso nan mayor tabata eynan y mi ta kere easy a haci tambe un gran impacto ariba e muchanan.”.

 

LEAVE A REPLY

Please enter your comment!
Please enter your name here