Na final di trato di e caso den Corte di Paul Croes, caso IBiS, a acusado tabata visiblemente afecta. El a admiti cu kisas bao di circunstancianan, el a comete un eror den decision tuma, cu a afecta esnan rond di dje. Pero cu esaki no tabata haci cu meta  malo, sino tratando pa yuda esnan cu tabatin mester di dje.

For di dialuna Hof a cuminsa trata e caso di apelacion contra Ninusca Nuñez, Robbio di Vecchi y Yvonne Martinus (OM a apela) y tambe esnan apela door di Paul Croes, Melony Croes-Paesch y Jairo Wever.

Tabata oranan largo di pregunta haci door di tres hues cu ta forma e constelacion di Hof. A bay hopi profundo riba e caso di Paul Croes, kende tabata e parti mas grandi di e caso IBiS, rond di kende henter e caso ta draai. Ta prome biaha cu na Aruba un caso asina a tuma luga, un investigacion cu a cuminsa riba e fecha di prome di september, 2016 ora cu Alexander van Dam a duna ordo pa cuminsa investigacion.

E caso aki, por lo menos e inval tabata e inicio di fin di e carera politico di Paul Croes, un hoben prometedor, kende a participa pa prome biaha den e eleccion di 2009, cu un popularidad basta grandi. Ya caba mi a acepta cu den politica mi no ta bolbe mas,” Croes a bisa den un di e declaracionnan cu el a duna na prensa e siman aki.

Croes a splica Corte cu el a apela e decision pasobra e ta sinti cu e no a haya un trato husto den prome instancia y ta kere fervientemente di no a comete un acto castigabel,  manera Ministerio Publico ta insisti.

No solamente durante tratamento di e caso, pero tambe den su ultimo palabra Croes no por a evita cu ta lagrimanan ta basha di su wowonan. “Mi sa cu mi a comete foutnan y tuma algun mal paso, cu a afecta principalmente mi yiunan y mi cas. Pero di esaki no tabata intencionalmente,” el a bisa. El a papia di su afan pa yuda esnan cu tabatin mester di ayudo. Mescos cu na e momentonan aki su mama ta trata di bende su cas pa yud’e sali di e gastonan financiero cu e caso aki tabatin riba dje. Esaki tabata un momento tambe cu el a sak su cabes cuminsa yora.

Abogado

Su abogado mr. Illes a trece dilanti  cu su cliente ta refuta tur e acusacionnan. Un gran parti di su defensa tabata basta riba e trato inhumano y humiyante. Unda cu a viola articulonan 3, 5, 6 y 8 di EVRM, cu ta regarda e parti di su trato den detencion preventivo. E ta haya cu mester duna un evaluacion di e proceder di Estado den e caso aki, unda cu no a percura pa derechonan di su cliente wordo salvaguardia.

A papia di e cantidad di dianan deteni, den isolacion unda cu a viola tur su derechonan. Durante 80 dia el a pasa cera den “beperking”; sin cu a permitie ni un Biblia den cual e por busca trankilidad spiritual. El a pasa tur e tempo den e ala psikiatrico di e prizon, cu ta den mal estado. Un situacion cu a hink’e den stress y hopi sufrimento.

E puntonan aki ta trece cu ne cu mester duna reduccion di castigo si Hof yega na e conclusion cu e ta culpabel. “E circunstancianan bao di cual Croes a wordo deteni na Aruba tabata hopi mas pisa di experiencianan na otro caminda. Su destino ta den boso man,” e Abogado a finalisa bisando.

Dia 21 di september tin e parti di su casa y lo cera tratamento di e caso. Despues di tres siman ta dicta sentencia.

LEAVE A REPLY

Please enter your comment!
Please enter your name here