E aña aki Aruba Scholarship Foundation (ASF) ta continua cu otorgamento di beca na e studiantenan cu kier sigui un estudio den exterior na un instituto di enseñanza superior. E becado sinembargo mester cumpli cu e rekisitonan fiha pa ASF, segun Formulario 2026/2027.

Cada aplicante por tuma contacto cu Aruba Scholarship Foundation riba e adres aki di ASF info@arubascholarships.com pa ricibi mas informacion y mester yena e formulario pa aplica pa beca cu ta disponibel via e link:

Ta bon pa download ASF Application 2026.

Mester entrega e documentonan rekeri den e formulario prome cu 15 di augustus 2026 na e mesun adres ariba menciona.

Aruba Scholarship Foundation tin varios criterio ora e ta evalua e documentonan ricibi di e candidatonan. Esaki ta conta tanto pa e candidatonan nobo como pa esunnan cu ya tin beca di ASF. Un di e criterionan cu ta pisa hopi cerca ASF ta e necesidad berdadero di ayudo financiero. P’esey e studiante mester por demostra esaki tambe ora e yena e formulario. Aruba Scholarship Foundation ta tuma varios factor di e parti financiero na consideracion. Por ehempel, gasto di estudio, entrada realmente disponibel di e famia vs e disponibilidad di fondo di otro fuente manera, Fiansa di Estudio di gobierno (Arubalening). E organisacion tambe ta tuma den consideracion loke e candidato mes a y ta haci pa yuda su situacion financiero.

Ta importante y hasta logico cu e instituto di enseñanza y e estudio mester ta reconoci (acredita) den e pais di estudio.

Si e studiante mester di mas informacion tocante e estudio cu e kier sigui of e instituto cu el a scoge, semper ta consehabel p’e acerca Departamento di Enseñansa pa guia profesional.

Tur studiante cu haya beca mester compromete su mes cu e ta bin traha na Aruba pa mes tanto aña cu el a studia cu beca di ASF. Tambe ta importante pa e studiante tin un bon prestacion na scol secundario, p.e. na HAVO, VWO, EPI, etc.

Nos ke menciona cu Aruba Scholarship Foundation ta un institucion completamente independiente y no ta afilia na niun otro organisacion. Su sosten financiero ta bin di contribucion di e miembronan di nos comunidad, manera di comercio, profesionalnan y otro persona cu ta comparti e vision di un Aruba miho prepara pa futuro. Directiva di ASF ta traha completamente Pro Deo.