Ayera mainta a tuma luga e ceremonia oficial den cuadro di celebracion di Dia di Rey na Wilhelminapark, cu presencia di dignatarionan, representante di gobierno y invitadonan special.
E acto protocolar a cuminsa cu ricibimento oficial di Su Excelencia e Gobernador hunto cu su distinguida esposa, y Prome Minister Mike Eman hunto cu su distinguida esposa, como tambe miembronan di Gabinete, parlamentarionan, representantenan di Hulanda na Aruba y e Corps Consulaire.
E ceremonia a inclui honornan militar cu presencia di e gewapende wacht, sigui pa inspeccion oficial door di Su Excelencia Gobernador. Posteriormente, a tuma luga e hisamento simultaneo di e bandera di Aruba y Hulanda, acompaña pa interpretacion di e Himnonan.
Durante e programa, e Presidente di Parlamento, Marlon Sneek, a dirigi palabra na tur presente, como tambe Minister di Relacionnan di Reino, Enseñansa, Hoben y Deporte y Vice Premier Gerlien Croes. E ceremonia, complementa cu presentacionnan cultural, incluyendo musica y baile.
Un momento special tabata e entrega di premio den cuadro di Copa Hubenil Gobernador Felipe B. Tromp, reconociendo talento y dedicacion di e hobennan di Aruba.
Den su discurso, Prome Minister Mike Eman a pone enfasis riba e significado profundo di e celebracion, resaltando no solamente e cumpleaño di Su Mahestad Rey Willem-Alexander, pero tambe e balor di union y conexion dentro di Reino Hulandes.
Eman a subraya cu, a lo largo di generacionnan, e Reino a mantene un laso fuerte a pesar di distancia geografico y diferencia cultural, destacando cu e Cas Real ta sirbi como un forsa unificador entre e paisnan.
“Awor mas cu nunca, nos mester reconoce e balornan di solidaridad, proximidad y apoyo mutuo cu semper a caracterisa nos relacion dentro di Reino,” Prome Minister a indica.
El a recorda cu tanto Aruba como Hulanda a para na banda di otro den momentonan dificil, reforsando e sentido di comunidad y cooperacion cu a crece a traves di generacionnan.
Den e mesun linea, Prome Minister a enfatisa importancia di reflexiona riba e balor di e Reino como un structura cu ta ofrece apoyo, stabilidad y oportunidad pa tur paisnan miembro.
Eman a expresa su gratitud pa Su Mahestad, resaltando su compromiso y interes sincero den bienestar di e islanan, particularmente durante su reciente bishita na Aruba, unda el a mustra interes activo den e desaroyo y retonan di e isla.
Finalmente, e Prome Minister a invita comunidad pa celebra e dia cu orguyo y reflexion, reconociendo tambe e aporte di deportistanan Arubiano cu ta pone Aruba riba mapa internacional.
E ceremonia a culmina cu ripiticion di e Himnonan y despedida oficial di e Gobernador, marcando un momento di respet, union y orguyo nacional.
