(AFP) – Demanda di Elon Musk acusando compania prominente di inteligencia artificial OpenAI di traiciona su mision sin fin di lucro ta bay pa huicio dialuna cu seleccion di hurado.
E lucha legal den un corte banda di golfo di San Francisco ta pone e persona mas rico di mundo contra un startup cu Musk algun biaha a sostene y cu awor e ta competi cune den e sector floreciente di AI.
ChatGPT di OpenAI ta un rival fuerte pa chatbot Grok, crea pa laboratorio xAI di Musk.
Mientras demanda di Musk ta parti di un pelea entre e y hefe ehecutivo di OpenAI Sam Altman, e tambe ta pone luz riba debate si AI finalmente mester sirbi pa beneficia un par privilegia of sociedad henter.
Documentonan di corte ta mustra con Altman a convence Musk pa sostene OpenAI na 2015, actuando manera co-fundador di un laboratorio sin fin di lucro cu su tecnologia “lo pertenece na mundo.”
Musk a pone miyones di dollar den e laboratorio, di cual despues el a sali.
Sinembargo, OpenAI a establece un subsidiario comercial pasobra e tabata mester centenares di biyon di dollar pa centronan di data pa duna poder na su tecnologia. Microsoft a pone biyon di dollar den OpenAI y su CEO Satya Nadella ta entre esnan programa pa testigua durante e huicio.
Musk ta argumenta den su demanda cu el a ser gaña tocante e mision altruista di OpenAI.
OpenAI, basa na San Francisco, a contesta den documentonan di corte cu e ruptura di relacion cu Musk tabata debi na su deseo pa control absoluto y no pa su status sin fin di lucro.
E compania a nota cu algun dianan despues cu Musk a drenta careda di AI na 2023, el a pidi un suspension di seis luna riba desaroyo di AI avansa.
E hues cu ta tratando e huicio lo dicidi durante luna di mei — guia pa e hayazgonan di un hurado asesor — si OpenAI a kibra un promesa na Musk den un carera pa lidera den AI of simplemente a probecha sabiamente di e tecnologia pa logra exito.
Ademas di pidi cu OpenAI ser forsa pa bolbe un entidad puramente sin fin di lucro, e demanda di Musk ta pidi destitucion di Altman y co-fundador Greg Brockman, kende ta presidente di e compania.
OpenAI awor tin un structura hibrido di gobernacion cu ta duna su fundacion sin fin di lucro control riba un brasa comercial.
Musk, kende a desmantela un team di confiansa y seguridad na Twitter despues di cumpra e plataforma social cu el a renombra X, ta enfrenta e reto di convence un hurado y un hues cu e compania tras di ChatGPT a ser construi riba un mentira.
