‘Aruba ta esencial pa e PDVSA nobo’

ORANJESTAD – A pesar di tur dificultad cu e proyecto di rehabilitacion di e refineria di San Nicolas ta pasando aden, pa CEO di Refineria di Aruba (RdA), Alvin Koolman, e proyecto aki ta uno factibel y prometedor, no solo pa Aruba sino pa Venezuela tambe.

E ta haya cu aunke e proyecto ta uno atractivo, e situacion geopolitico den e region, y tambe di e regimen di Nicolas Maduro na Venezuela, ta haci cu ta casi imposibel di por haya un instituto financiero pa e proyecto di rehabilitacion di e refineria por bira factibel.

A pesar di tur e retonan aki, e ta convenci cu esaki ta un proyecto cu no mester stop. Tambe el a bisa cu e proyecto ariba su mes no ta na peliger. Te hasta e ta haya cu aworaki e chens pa e proyecto por bira realidad ta hopi mas cu antes, bou e regimen Maduro.

Sinembargo, e ultimo riesgo cu tin ta cu e ta wordo poni ‘on hold’ durante tur e transicion na Venezuela. Nan ta percura pa esaki no pasa, ya cu e ta un proyecto cu ta yuda Aruba grandemente den su finansa, y tambe como fuente di trabou.

Actualmente nan tin alrededor di 300 trahado den e refineria: 150 trahado ta traha directamente cu e refineria y 150 ta contratista. E situacion actual ta pone cu cuater compania di contratista, cu mester bin nobo, cu tin di haber cu e fase dos, nan ta wordo poni on hold, ya cu ainda no a bin cla cu e parti financiero. Mientras cu e parti cu mester wordo haci cu ta esencial pa e refineria lo sigui normalmente, segun Koolman.

Nan lo percura hunto cu gobierno di Aruba pa e parti di financiamento di e fase dos por continua, y percura cu e hende local por conserva nan trabou. Segun Koolman, te ainda nada ta mustra cu esaki no lo ta e caso treciendo asina un poco di trankilidad laboral. Ya cu e autoridadnan Mericano, pero tambe e hendenan di e presidente interino na Venezuela, Juan Guaidó na Merca, ta zorg pa e situacion di transicion aki no afecta substancialmente e operacion den e refineria. Tambe pa Aruba no cay bou e sancion nan, ya cu ‘Aruba ta esencial pa e PDVSA nobo.’

Pa loke tin di haber cu un menasa di welga di e miembronan afilia na sindicato IOWUA, Koolman no sa pa kico e lider sindical a bisa esey. El a cualifica como un declaracion ‘iresponsabel,’ ya cu actualmente nan ta den un situacion delicado, y no ta consehabel pa bin cu un welga cu por pone trabou di e trahadonan na peliger.

Dos opcion riba mesa tabata, si ta bin otro compania petrolero interesa of si eventualmente ta bin un cambio den e regimen Maduro. E ta haya cu si tin un cambio den e regimen di Nicolas Maduro, e ta uno positivo cu sigur e sancionnan ta wordo lanta, y ta bin inversionnan necesario pa start e refineria nacional, maneha pa RdA y cu a wordo gehuur na Citgo.

El a recomenda un buki publica recientemente, skirbi pa Leopoldo Lopez y Gustavo Vaquero, unda ta wordo delinea e prioridad di Venezuela si ta surgi un cambio di gobierno.

E prioridad number uno ta esun di subi e produccion di crudo y gas. Koolman a señala cu Aruba ta e unico proyecto cu den periodo di 14 pa 16 luna por subi e produccion di crudo Venezolano na alrededor di 150 mil bari pa dia. Actualmente, nan ta produci 1.1 miyon bari. Kiermen nos ta papiando cu Aruba por produci pa nan alrededor di un 10% den un periodo cortico. Venezuela su economia ta basa riba produccion di crudo, y e plan cu nan a mustra ta pone cu Aruba ta fix den esey. E ta considera cu Aruba su refineria ta un di e proyectonan masha atractivo, unabes cu ta wordo produci un cambio den e regimen na Venezuela.

E tabata masha realistico pa bisa cu si ta wordo dicidi pa kita e refineria for di Citgo e ta algo contradictorio pasobra toch bo tin cu bay bira cara bek na e pais bisiña, ya cu e crudo Venezolano ta e unico cu por wordo upgrade. E crudo di franha di Orinoco ta masha pisa cu mester di un mehoracion.

You May Also Like

Ivan Croes, presidente Lion’s Club: ‘Cualkier yudansa, cu mil amor nos ta haci’e’

Recientemente Bon Dia Aruba tabata tin un entrevista cu president di Lion’s club Ivan ...

image.jpeg

Electric Festival lo ta dianan 1 te cu 4 september 2016

E Organisacion Di Rumannan Neme y Aruba Tourism Authority (ATA) ta Anuncia Fechanan di e di 4 Edicion Di Electric Festival Aruba Aruba ta preparando pa ricibi e di ...

area di buskeda La Rumbera

Cantidad persona riba boto perdi ta 9, nombernan conoci

No tin 10 pero 9 persona riba e boto perdi La Rumbera. E nombernan ...

Edmar Winterdaal: “A keda pidi cuido special pero haya Paracetamol”

Siman pasa un mayor a ricibi un noticia cu sigur ningun mayor kier scucha ...

customs_6797.jpg

Departamento di Aduana cu recordatorio importante pa biaheronan

Departamento di Aduana kier recorda tur persona biahando pa exterior y cu lo bay ...