ORANJESTAD – Minister di husticia, Andin Bikker a referi na e fenomeno reciente di peticion di asilo politico a base di tratado cu Aruba a yega di firma den pasado. Awor e cantidad ta aumentando, debi na e situacion di migrantenan Venezolano cu ta huy for di e situacion interno di nan pais di origen.

Aña pasa tabatin un par di dia cu alrededor di 255 persona a meld na DIMAS pa asilo, y nan a wordo registra. Contestando preguntanan di Bon Dia Aruba, Bikker a referi cu durante fin di siman tras di lomba, tabatin un incidente cu 9 pasahero cu a bin pidi asilo. El a aclaria cu no tabata 10 pasahero, manera un media a yega di informa.

E cifra di solicitud di asilo ta aumentando, y gobierno ta purba di evita cu ta wordo haci uzo indebi di e proceso di asilo. Di tur aplicacion haci aña pasa, nan a ripara cu gran mayoria di nan no tin derecho di asilo bou e tratado cu Aruba a firma varios decada atras. Segun e mandatario, Aruba no tin espacio pa asina yama ‘asilo economico’ pa adopta problemanan di paisnan bisiña di e magnitud aki.

Pais Aruba tin e tratado di refugiado, y tambe e tratado di derechonan humano. Pero pa medio di un proposicion di ley (Art. 20 inciso 2) cu a wordo aproba na november, y a drenta na vigor dia 1 di december ultimo, tin un base legal specifico pa atende cu e situacion aki.

Pero e base legal aki ta mas amplio, no solamente ta regarda asunto di asilo, pero pa bin cu diferente tecnologia pa realisa pre screening inicialmente cu e bishitante Venezolano. E persona cu ta bin pidi asilo mester ta honesto, caminda e ta meld su mes cu e ta pidiendo un proteccion a base di e tratado aki.

Pero awor gobierno ta bay detecta e personanan cu ta pretende di ta turista, y despues ta busca manera pa keda akinan. “Esey ta otro dimension. Esey no tin di haber cu asilo,” el a bisa. Tambe nan ta bezig cu unabes e persona ta pidi asilo, nan ta scucha, check y verifica nan relato, pa wak si e ta bay na remarca pa asilo politico of como refugiado.

E procedura aki lo determina si e peticion di asilo ta wordo honra of nenga. Aunke actualmente Aruba tin un team cu ta atendiendo cu e asunto aki. Pero gobierno a pidi Hulanda ayudo tecnico pa bin training di dos luna, pa mas personal y asina lihe amplia e team aki. Awe nan ta cuminsa cu training local di 10 persona. E intencion ta pa amplia e team aki cu 10 pa 20 persona adicional, pa atende cu solicitud di asilo. Unabes cu e persona ta bin Aruba y bati pa asilo, e team aki rapidamente ta bay wak si e peticion aki tin merito.

E mandatario a laga sa cu e situacion relaciona cu e ola di migrante Venezolano ta un echo historicamente sin precedente, cu no solamente Aruba, sino diferente pais ta confronta cune. Pa loke ta trata e peticion di Monseñor Secco pa bin cu fundacion CARITAS, gobierno a reuni cu clero y nan a scucha nan preocupacion, pero nan no a yega na niun palabracion specifico riba e tema aki.