Gobierno no tin maneho integral…. Citgo y hotel ta e prueba palpable

Nos ta haya nos confronta atrobe cu e hecho cu e maneho di gobierno ta parce parcialisa, pa no bisa plama y na su momento hasta contradictorio. No ta mucho dia pasa cu a alegra nos cu e moratorio riba camber di hotel y otro acomodacion turistico. Nos no tabata kier a mustra cinico puntrando na estilo Mericano: “what’s the catch?” Simultaneamente na e momento aki nos ta pasando den e ultimo dianan di e derecho di ‘inzage’ den e ‘ROP’ nobo, cu pa loke ta e area concerni aki no ta haci tanto diferencia, pasobra den e plan actual, di 2009, e ta marca como ‘uitbreiding-reserve toerisme’. Ta pa casualidad e rapport tocante e proyecto di hotel aki ta surgi? Asina leu cu nos sa e no a ‘leak’ pero ta conscientemente a duna cierto organisacionnan ambientalista esaki; pa cumpli cu cierto obligacion di ‘consulta’? Cierto politico, di e actual coalicion a mustra nan sorpresa, pasobra nan lo no tabata na altura. Ta hende serio pues nos no ta pensa cu nan ta fingiendo mientras nan tabata bon na altura. Anto apenas e debate politico lo ta cuminsando awor.

En todo caso tanto tempo despues di Bahia Principe, ata nos cu exactamente e mesun discusion. Pa colmo, nos no por sa mes si ta trata di e mesun grupo, o di otro financista, pasobra loke ta conoci na e momento aki ta cu e compania local cu ta carga e proyecto, ta scondi tras di otro compania di trust, di manera cu ningun caminda ta aparece ken ta e berdadero inversionistanan. Tin rumor cu ta trata di e mesun desaroyadornan di Zoetry, cu lo a haya un ‘compensacion’ pa e cancelacion di e proyecto na Isla di Oro. Tempo lo bisa. Y ademas, e inversionista no ta e punto mas importante, pasobra mester evalua e proyecto riba su mes y esey ta loke nos ta purba haci. Pero si ta spera di un gobierno cu a priminti cu di awor en adelante ta practica transparencia, pa bin dilanti cu e informacion completo tocante e financista y operadornan.

Loke ta yama nos atencion cu nos no ta mira coherencia den e cosnan cu ta tuma lugar simultaneamente. Un di nan ta e hecho cu como pais nos tin e sagrado obligacion di drecha loke no ta bon, y den esey San Nicolas ta number un riba cualkier lista. Cu un, practicamente sigur desaparicion di e refineria, y e estado di deterioro di e centro comercial di e ciudad aki, lo ta logico pa conecta mas tanto posible e oportunidadnan economico cu otro. Un terminal di fast-ferry ta bon, pero lo no salba e ciudad. E plan pa desaroya un ‘waterfront’ na unda awor ainda ta (parti di) e tereno di refineria ta otro idea cu por resulta factible, y hasta exitoso. Y cu ta orienta riba desaroya San Nicolas mes. Sero Colorado no ta San Nicolas. Y scogiendo pa un formula di ‘all-inclusive’ pa e prome fase di 600 camber, no ta parce algo cu por yuda San Nicolas, al menos, no optimalmente. Un hotel di e magnitud aki, mira un rato los di e obhecionnan ambiental, por significa hopi pa e ‘spinoff’ den San Nicolas y lo conecta cu e plan di un waterfront den centro di e ciudad. Y kico si e proyecto aki keda pega na 600 camber y e 300 cambernan adicional di formula no inclusivo no fructifera nunca…? Esey por ta un ‘blessing in disguise’ pa loke ta e problema di mercado laboral, unda cu probablemente, miho bisa sigur, nos mester bay importa un cantidad di hende pa por opera un empresa di e tamaño aki. E consecuencianan pa nos fondonan ta conoci caba, si bo ta haya salario cu ta contribui bao di 100 florin na AZV, mientras cu e gasto medico promedio individual ta bay den direccion di tres mil florin pa aña caba. Pa colmo, esaki ta un di e seis lotenan wardando inversionista, pa un total di 2.500 camber…

Riba tur esaki ta bin e asunto di e refineria, cu ta parce morto, solamente cu nan no a der’e ainda. Ta ya caba 6 aña pasa cu Camara di Comercio hunto cu otronan den nos economia a tuma e iniciativa pa pensa kico por haci si no tin refineria mas. Miedo panico pa pensa kico lo mester bin na su lugar no ta yudando nos pa nada. No ta berdad cu si no tin un refineria mas, no por haci nada cu e tereno, al contrario. Esaki no ta e lugar pa bay elabora riba esey, pero ta gobierno mester ta poniendo su miho esfuerso pa rehabilita e ciudad aki. Awor, facilmente nos ta haya e critica di esnan cu ta pro e proyecto di hotel aki, cu esaki ta hustamente nan ‘solucion’ pa e problema di San Nicolas. Atrobe nos ta haya nos cu hende cu aparentemente ta pensa solamente for di e proyecto cu nan kier logra, y no ta capaz di mira un ‘bigger picture’ aki. Aruba a pronuncia su mes fuertemente contra mas hotel, y asina mes nos ta ‘end up’ cu otro Bahia. Nan tin mas chasco asina?

You May Also Like

Porfin ley di defensor publico

Ainda falta cambio di mentalidad Despues cu e ley di defensor publico (ombudsman), a ...

editorial 2_15_1.jpg

Union inespera den parlamento pa amienda

E sorpresa grandi  den e reunion publico di parlamento di diahuebs ultimo tabata e ...

Den caso di Citgo tambe…

Emocion ta mal consehero! Ora nos a kere cu e stof cu a lanta ...

editorial 2_44.jpg

Europe Rising Star of Tennis

Man bun bespoke freegan, kitsch retro ethical banh mi williamsburg drinking vinegar sustainable heirloom ...

editorial 2_44.jpg

How Whild Changes The Music Scene

Man bun bespoke freegan, kitsch retro ethical banh mi williamsburg drinking vinegar sustainable heirloom ...

Kita prome, despues pone atrobe; Entre decision mal tuma y incertidumbre

Remarcable tabata den e dianan aki e decision di gobierno pa revoca e medida ...