Aruba ta gana medaya den Campeonato Panamericano Masters di Pesas

Den e PanAmerican Masters Weightlifting Championships cu a tuma luga na Orlando, Florida for di 30 mei pa 2 juni 2019, Aruba a bay cu un delegacion cu ta consisti di Hugo Themen, Americo Thijzen, Jennifer Piter y Walter Llerena for di Ecuador, cu ta entrenado di seleccion di Aruba, tambe a forma parti di e grupo di atleta masters. Den e evento Masters aki tabata tin participacion di mas di 300 atleta di e continente Panamericano.

E campeonato aki a tuma luga den e Ballroom di Wyndham Resort International Drive na Orlando , Florida, USA.

Diahuebs a competencia a cuminsa, unda a toca turno pa Hugo Themen, edad 60 pa 64. Hugo ta logra den su hisadanan den snatch 68kg, clean & jerk 81kg pa un total di 149kg. Cu e resultado aki, Hugo ta logra termina na di dos luga, ta gana dos medaya di Plata y un medaya di Brons pa Aruba.

Diasabra a toca turno pa Walter Llerena, cu a competi den categoria di 89kg, grupo di edad 45 pa 49. Llerena ta logra den su hisadanan den snatch 121kg, clean & jerk 151kg pa un total di 272kg. Cu e total aki Walter ta termina na di prome luga y ta gana tres medaya di Oro pa pais Ecuador. Cu e hisadanan aki, Walter ta logra kibra tres record Panamericano y un record Mundial.

Diadomingo mainta a toca turno pa nos atleta femenino, Jennifer Piter, cu a competi pa prome biaha den un PanAmerican Masters Weightlifting Championships, den categoria di 59kg den grupo di edad 35 pa 39. Jennifer ta logra den su hisada den snatch 68kg, clean & jerk 87kg pa un total di 155kg; cu e total aki Jennifer ta sali na di dos lug,a ta gana dos medaya di Plata y 1 medaya di Brons pa Aruba.

Por ultimo, Americo Thijzen tambe ta participa den un magno evento asina, den grupo edad 35 pa 39. Americo den su hisadanan ta logra den snatch 94kg, clean & jerk 115kg pa un total di 209kg. Americo ta termina na di 8 luga.

Aruba Amateur Weightlifting Association kier a gradici Aeropuerto Internacional Reina Beatrix cu a cubri parti di e biahe y palabra di pabien grandi na e atletanan Hugo Themen, Walter Llerena, Jennifer Piter y Americo Thijzen cu nan medayanan y nan participacion den e Pan American Masters Weightlifting Championships teni na Orlando, Florida, USA. Den 2020 e Pan American Masters Weightlifting Championships lo bay tuma luga na Puerto Rico.